Հայաստանի նախագահը քվեարկել է Երևանի Ավագանու խորհրդի ընտրություններին

Հայաստանի նախագահ Սերժ Սարգսյանը քվեարկել է իր ընտրատեղամասում Երևանի Ավագանու խորհրդի ընտրություններին։

Ինչպես հաղորդում է «Նովոստի-Արմենիա» գործակալության թղթակիցը Երևանի Ս.Սպանդարյանի անվան դպրոցում տեղակայված 9/10 ընտրատեղամասից, նախագահը լավ տրամադրությամբ ժամանել է ընտրատեղամաս կնոջ և դստեր ուղեկցությամբ։

Քվեարկելով՝ ՀՀ նախագահը ընտրությունները մեկնաբանելու վերաբերյալ լրագրողների խնդրանքին ի պատասխան ասել է. «Այսօր լռության օր է»։

Մինչ նախագահի ժամանումն այդ ընտրատեղամասում գրանցված 1936 ընտրողից արդեն քվեարկել էր 188 մարդ։

Երևանում մայիսի 31-ին անցկացվում են Ավագանու խորհրդի ընտրություններ, որոնք կկարողանա մասնակցել 771,5 հազար մարդ:

Սա Երևանի պատմության մեջ առաջին Ավագանու խորհրդի ընտրություններն են։  «Երևանում տեղական ինքնակառավարման մասին» նոր օրենքի համաձայն՝ նախատեսվում է Երևանում ստեղծել 65 անդամից բաղկացած և համամասնական ընտրակարգով ձևավորվող Ավագանու խորհուրդ։ Երևանի քաղաքապետի պաշտոնը կզբաղեցնի այն կուսակցության համամասնական ցուցակի առաջին համարը, որը ընտրությունների ժամանակ կհավաքի ձայների մեծամասնությունը:

Երևանի Ավագանու խորհրդի ընտրություններն անցկացվում են համամասնական ընտրակարգով:

Ընտրություններին մասնակցում են «Բարգավաճ Հայաստան» կուսակցությունը, ՀՀԿ-ն, «Օրինաց Երկիր» կուսակցությունը, ՀՅԴ-ն, Ժողովրդական կուսակցությունը, ՀՀ Աշխատավորական սոցիալիստական կուսակցությունը և ՀԱԿ նախընտրական դաշինքը։  --0—