Հայաստանի նախկին նախագահը կարող է ընդգրկվել «Սիստեմա» ԲՖԿ տնօրենների խորհրդի կազմում

ՀՀ նախկին նախագահ Ռոբերտ Քոչարյանը, ով ղեկավարել է երկիրը 1998-2008 թթ.-ին, կարող է դառնալ «Սիստմեա» բաժնետիրական-ֆինանսական կորպորացիայի անկախ տնօրեն։

Ինչպես հաղորդվում է «Սիստեմա» կորպորացիայի տեղեկատվության մեջ՝ այս տարվա հունիսի 27-ին կայանալիք ընդհանուր ժողովի ժամանակ բաժնետերերին առաջարկվելու է ընտրել 13 անդամներից բաղկացած Տնօրենների խորհուրդ։

«Անկախ տնօրենների խորհուրդը մնում է կորպորատիվ կառավարման կարևորագույն գործիքներից մեկը, և մենք մտադիր ենք շարունակել դրա զարգացումն ու կատարելագործումը՝ «Սիստեմա» կորպորացիայի տնօրենների խորհրդի կազմում որպես անկախ տնօրեն առաջադրվել է երկու թեկնածություն՝ Ռոբերտ Քոչարյանինը և Ռաջիվ Մեհրոթրայինը», - նշել է «Սիստեմա» ԲԲԸ-ի տնօրենների խորհրդի նախագահ Վլադիմիր Եվտուշենկովը։

Ռոբերտ Քոչարյանը տասը տարի զբաղեցրել է ՀՀ նախագահի պաշտոնը, իսկ Ռաջիվ Մեհրոթրան հիմնադրել է Shyam Group of Indiի հնդկական ընկերությունը, որը «Սիստեմայի» հետ միասին Sistema Shyam TeleServices բջջային օպերատորի սեփականատերն է։

Բացի այդ Կորպորացիայի տնօրենների խորհրդի կազմում են առաջադրվել կորպորացիայի տնօրեն և СЕО Լեոնիդ Մելամեդը, ինչը ևս «Սիստեմայում» ընդունված պրակտիկա է։

Ռոբերտ Քոչարյանը ծնվել է 1954 թվականի օգոստոսի 31-ին Լեռնային Ղարաբաղի ինքնավար մարզի Ստեփանակերտ քաղաքում։ 1982 թ.-ին գերազանցության դիպլոմով ավարտել է Երևանի պոլիտեխնիկական ինստիտուտի էլեկտրատեխնիկական ֆակուլտետը: Աշխատել է Ստեփանակերտի էլեկտրատեխնիկական գործարանում, տարբեր պաշտոններ է զբաղեցրել Լեռնային Ղարաբաղի կոմերիտական և կուսակցական մարմիններում։

1989 և 1990թթ. ընտրվել է Հայաստանի Գերագույն խորհրդի պատգամավոր,ապա Գերագույն խորհրդի նախագահության անդամ: 1991թ. ընտրվել է ԼՂՀ առաջին գումարման Գերագույն խորհրդի պատգամավոր: 1992 թ.-ից զբաղեցրել է Լեռնային Ղարաբաղի Հանրապետության Պաշտպանության պետական կոմիտեի նախագահի պաշտոնը, իսկ 1994 թ.-ից՝ ԼՂՀ նախագահի պաշտոնը։

1997 թ.-ին Ռոբերտ Քոչարյանը նշանակվել է ՀՀ վարչապետ, իսկ 1998-2008 թթ.-ին ընտրվել է ՀՀ նախագահի պաշտոնում։

«Սիստեմա» բաժնետիրական-ֆինանսական կորպորացիան Ռուսաստանում և ԱՊՀ-ում ծառայություններ է մատուցում ավելի քան 100 միլիոն սպառողի։ Այն աշխատում է այնպիսի ոլորտներում, ինչպիսք են հեռահաղորդակցությունը, բարձր տեխնոլոգիաները, ՎԷՀ-ը (վառելիքաէներգետիկ համալիր) և նավթաքիմիան, ռադիո և տիեզերական տեխնոլոգիաները, բանկային բիզնեսը, անշարժ գույքը, մանրածախ առևտուրը, մեդիան, զբոսաշրջությունն ու բժշկական ծառայությունները։-0-