Թուրքիան օպտիմալ քաղաքականություն է վարում Հայաստանի նկատմամբ, ասել է Ռուսաստանում Թուրքիայի արտակարգ և լիազոր դեսպան Հալիլ Աքընջըն ռուսական բիզնես հեռուստատեսության (РБК) կայքում անցկացված ինտերնետ-ասուլիսի ժամանակ՝ պատասխանելով «Նովոստի-Արմենա» գործակալության հարցին։
Նրա խոսքերով, Թուրքիայի և Հայաստանի միջև առկա խնդիրները ոչ միայն փակ սահմանների մեջ են։ «Գոյություն ունեն հարաբերություններ Թուրքիայի և Ադրբեջանի միջև, որոնց մասին մենք ասում ենք, որ «դա մեկ ազգ է և երկու պետություն»», - ասել է Աքընջըն։
Բացի այդ, նրա խոսքերով, տարբերություններ կան պատմության որոշ իրադարձությունների մեկնաբանության շուրջ։
«Թուրքիան վերջին ժամանակներում այնպիսի քաղաքականություն է վարում, որ հարևանների հետ խնդիրներ չունենա, և Թուրքիան այդ ուղղությամբ շատ ջանքեր է գործադրել։ Օրինակ՝ Հայաստանից դեպի Ստամբուլ չվերթներ են իրականացվում։ Ցամաքային սահմանը փակ է, սակայն օդայինը բաց է։
Մյուս կոսմից, պետք է նայել, թե ինչ է անում Հայաստանը։ Այսինքն, դիվանագիտական հարաբերությունները պետք է վերականգնվեն, սակայն դրան զուգահեռ պետք է լուծվեն Ղարաբաղի և հայ-ադրբեջանական հարաբերությունների խնդիրները», - ասել է դեսպանը։
«Թուրքիան բարի կամք է դրսևորել, և նախորդ տարի մեր նախագահը գնացել է Երևան՝ որպես ֆուտբոլային հանդիպման հանդիսատես։ Մենք այս հարցում իրատես ենք և օպտիմալ քաղաքականություն ենք վարում Հայաստանի նկատմամբ։ Սակայն Հայաստանը պետք է հասկանա, որ նա ևս պետք է որևէ քայլ անի։ Մեր անկեղծ ցանկությունն է, որպեսզի Կովկասում բոլոր սահմանները բաց լինեն և բոլորը միմյանց բարեկամ լինեն», - նշել է դիվանագետը։
Դեսպանը նաև հիշեցրել է, որ նախորդ տարվա օգոստոսյան իրադարձություններից հետո, երբ բախումներ տեղի ունեցան Ռուսաստանի և Վրաստանի միջև, Թուրքիան առաջ քաշեց Կովկասում կայունության և համագործակցության պլատֆորմ ստեղծելու նախաձեռնությունը։-0-
