ՀՀ մարդու իրավունքների պաշտպան Արմեն Հարությունյանն իր աշխատանքի առանցքային խնդիրն է համարում քաղաքական և քաղաքացիական ազատությունների պաշտպանությունը։
«Մեր հնգամյա աշխատանքի արդյունքների ամփոփումը ցույց է տալիս, որ շեշտը պետք է դնել հիմնականում քաղաքական ազատությունների պաշտպանության վրա։ Քաղաքացիական հասարակության զարգացմանը զուգահեռ շատ սոցիալ-տնտեսական հարցեր լուծվում են ինքնաբերաբար»,- ասաց նա Երևանում «Արտահայտվելու ազատություն և արդար դատաքննության իրավունք» միջազգային խորհրդաժողովի բացման ընթացքում։
Օմբուդսմենը նշեց, որ արտահայտման ազատությունը և արդար դատաքննության իրավունքը «բանալիներ են, որոնց օգնությամբ կարելի է ոչ թե բարելավել, այլ բուժել երկրում մարդու իրավունքների հետ կապված իրավիճակը»։
Հարությունյանը հայտնեց, որ Մարդու իրավունքների եվրադատարանի կողմից քննվող մոտ 100 հազար դատական գործերից հազարը Հայաստանից են։
Տոկոսային հարաբերությամբ այսքան մեծ թվով գործերը, նրա խոսքերով, բացատրվում է հանրապետության բնակչության անվստահությամբ ազգային արդարադատության նկատմամբ, որի բոլոր աստիճանների պարտադրված անցումը հիմք է հանդիսանում Եվրոպական դատարան դիմելու իրավունքի համար։
Ըստ նրա, նմանատիպ հարաբերության հիմնավորվածության մասին վկայում է այն, որ սեփականության իրավունքի օտարման վերաբերյալ գործերը վերջին 6-7 տարիների ընթացքում ազգային դատարանները ոչ մի անգամ չեն ավարտել քաղաքացիների օգտին, և դա այն դեպքում, երբ բոլոր նմանատիպ գործերը, որոնք հասել են մինչև Եվրադատարան, ավարտվել են քաղաքացիների հաղթանակով։
Հարությունյանը հայտնեց, որ վերջին երեք տարիների ընթացքում մարդու իրավունքների պաշտպանի գրասենյակ է դիմել մոտ 6 հազար մարդ, և հիմնականում բողոքները կապված են արդար դատաքննության, սեփականության, դատախազության, ոստիկանության, քաղաքապետարանի գործունեության, սոցիալական և աշխատանքային հարցերի իրավունքների հետ։
Աշխատանքի հիմնական դժվարությունները, նրա խոսքերով, պաշտոնյաների անտարբերությունն է, նրանց՝ համագործակցել չցանկանալը, սակայն իրավիճակն աստիճանաբար բարելավվում է։
Օմբուդսմենը նշեց նաև, որ իշխանությունն ու ընդդիմությունը վերջիվերջո հասկացան, որ մարդու իրավունքների պաշտպանի ինստիտուտը նրանց մի մասը չէ, այլ ունի իր անկախ մոտեցումը։ «Այն ավելի շուտ կարող է միջնորդի դեր խաղալ, քան գործիք լինել նրանց ձեռքում»,- ասաց Հարությունյանը, հավելելով, որ հետագայում էլ կշարունակի այդ քաղաքականությունը։
«Արտահայտվելու ազատություն և արդար դատաքննության իրավունք» միջազգային խորհրդաժողովը նվիրված է Հայաստանում մարդու իրավունքների պաշտպանի ինստիտուտի հիմնադրման հնգամյակին։ Համաժողովին մասնակցում են Ռուսաստանի, ԱՄՆ-ի, Մեծ Բրիտանիայի, Ֆրանսիայի, Գերմանիայի, Բուլղարիայի, Չեխիայի, Լեհաստանի, Վրաստանի, Իտալիայի, Իրանի, Լիտվայի, Բելառուսի և Մոլդովայի և տարբեր միջազգային կազմակերպությունների ներկայացուցիչներ։ Միջոցառումը կշարունակվի մինչև մայիսի 26-ը։ -0-
