ԵՐԵՎԱՆ, 22 մայիսի. /Նովոստի-Արմենիա/. Առաջին անգամ Հայաստանում անցկացվող «Կենգուրու»միջազգային մաթեմատիկական մրցույթում հաղթեց Գեղարքունիքի մարզի ութերորդ դասարանի աշակերտուհի Էռնա Պետրոսյանը, ով կմասնակցի Ռումինիայում անցկացվող ամառային ճամբարին։
Այս մասին ուրբաթ մամուլի ասուլիսի ժամանակ հայտարարեց «Այբ» հիմնադրամի գործադիր տնօրեն Դավիթ Սարգսյանը՝ մրցույթի բացառիկ կազմակերպիչը։
Ըստ նրա, միայն Պետրոսյանին հաջողվեց հաղթահարել անհրաժեշտ միավորների շեմը։
«Բարձր ցուցանիշներ է ցույց տվել 111 աշակերտ, և, ընդհանուր առմամբ, մրցույթի արդյունքները Հայաստանում բարձր են։ Այս մրցույթի էությունը նրանում է, որ մասնակիցները չեն մրցում միմյանց հետ, այլ ստուգում են իրենց գիտելիքները»,- ասաց Սահակյանը։
Ըստ նրա, մրցույթը երեխաների հետաքրքրությունը մաթեմատիկայի հանդեպ բարձրացնելու և «մրցույթը մաթեմատիկայի տոն» վերածելու նպատակ ունի։
«Այբ» հիմնադրամի գործադիր տնօրենը հայտնեց նաև՝ քանի որ մրցույթը հանրապետությունում առաջին անգամ է անցկացվում, որոշվել է ևս մեկ փուլ անցկացնել այն մասնակիցների շրջանում, ովքեր առավելագույնն էին մոտ հաղթանակին։ Միաժամանակ, լավ արդյունք ցույց տված երկու մասնակից կմիանան հաղթողին և կմեկնեն Ռումինիա։
Սահակյանի խոսքերով, հաջորդ տարի նախատեսվում է մրցույթ անցկացնել նաև Լեռնային Ղարաբաղում և Վրաստանի հայաբնակ շրջանում՝ Ջավախքում:
«Կենգուրու» մրցույթին Հայաստանում մասնակցեց ավելի քան 30 հազար աշակերտ հանրապետության 570 դպրոցից։
Մրցույթի գլխավոր հովանավորն էր ՎՏԲ Հայաստան բանկ ՓԲԸ-ը։
«Կենգուրուն» տրամաբանական և բավականին հետաքրքրաշարժ խնդիրներից կազմված մրցույթ է, որն ամեն տարի նույն օրն անցկացվում է մոտ 50 երկրում` ավելի քան 5 միլիոն դպրոցականի մասնակցությամբ:
«Կենգուրու» մրցույթն անցկացվում է անմիջականորեն դպրոցներում` երեխաների համար հարազատ միջավայրում, և մասնակցության նախապայմաններ չկան: Երեխաներից չի պահանջվում դպրոցական ծրագրի, բանաձևերի փայլուն իմացություն կամ միայն գերազանց գնահատականներ մաթեմատիկայից: Փոխարենը` «Կենգուրուի» խաղային ոճով կազմված խնդիրները դուր են գալիս տարբեր առաջադիմություններով երեխաներին: Մրցույթը դպրոցականների շրջանում մեծ մասսայականություն է վայելում նաև շնորհիվ մասնակիցների տարիքային լայն խմբերի: --0-
