ՀՀ ոստիկանությունը պարզում է Արտաշատում տեղի ունեցած հերթական կռվի հանգամանքները

ԵՐԵՎԱՆ, 21 մայիսի. /Նովոստի-Արմենիա/. ՀՀ ոստիկանությունը պարզում է Արտաշատ քաղաքում նախօրեին տեղի ունեցած հերթական կռվի հանգամանքները։

Ինչպես ասվում է Ոստիկանության օպերատիվ ամփոփագրում, մայիսի 20-ի ժամը 12.00-ին 28-ամյա Ա. Ավագյանը դիմել է ոստիկանության Արտաշատի բաժին և հայտնել, որ նույն օրը, ժամը 11.30-ի սահմաններում, Արարատի և Վայոց Ձորի մարզերի ընդհանուր իրավասության դատարանի շենքի մոտ, «Հայռուսգազարդ» ՓԲԸ Արտաշատի մասնաճյուղի տնօրեն, 50-ամյա Հովհաննես Ղազարյանը և նրա եղբայրը` 36-ամյա Մկրտիչ Ղազարյանը, մի քանի իրեն անծանոթ անձանց հետ կոպիտ կերպով խախտելով հասարակական կարգը, շուրջ 10 րոպե հայհոյել ու ծեծի են ենթարկել իրեն և դատարանի դահլիճում նստած իր ընկերներ Հ. Գուլաբյանին, Ա. Ղազարյանին, Գ. Հակոբյանին, Ռ. Սարգսյանին և Ա. Աթանեսյանին:

«Նշանակվել են համապատասխան դատաբժշկական փորձաքննություններ:

Ձեռնարկվում են միջոցառումներ Հովհաննես ու Մկրտիչ Ղազարյաններին և մյուսներին հայտնաբերելու ուղղությամբ»,- ասվում է հաղորդագրության մեջ:

Ինչպես հայտնում է ՀՀ ոստիկանությունը, փաստի առթիվ հարուցված քրեական գործի շրջանակներում նույն օրը ժամը 22.30-ին ոստիկանության ԿՀԴՊ, ՔՀ գլխավոր և Արարատի մարզային վարչություննների աշխատակիցները 53-ամյա Հ. Մելիքսեթյանի բնակարանի խուզարկությամբ, հյուրասենյակի մահճակալի տակից հայտնաբերվել է 16 մմ տրամաչափի երկփողանի որսորդական հրացան, որն առգրավվել և ուղարկվել է փորձաքննության:

Փաստի առթիվ հարուցված քրեական գործի շրջանակներում նույն օրը ժամը 22.50-ին 21-ամյա Վ. Ամիրզադյանի բնակարանի խուզարկությամբ, ննջասենյակի պահարանից հայտնաբերվել են վերջինի կողմից առանց հաշվառման պահվող 16 մմ տրամաչափի երկփողանի որսորդական և օդամղիչ հրացաններ, «ԱԿՄ» տիպի ինքնաձիգի 7,62 մմ տրամաչափի հինգ և 16 մմ տրամաչափի որսորդական հրացանի չորս փամփուշտ, լուսաձայնաազդանշանային փամփուշտ կրակելու ինքնաշեն սարք, սղոցման ատամներով դանակ և «Մոտոռոլա 5118» տիպի ռադիոկապի երկու միջոց:

Հայտնաբերվածն առգրավվել և ուղարկվել է փորձաքննության: Կատարվում է նախաքննություն։

Սա վերջին շրջանում Արտաշատ քաղաքում արդեն երկրորդ խոշոր միջադեպն է։

Առաջին միջադեպի հետ կապ ուներ նաև հայկական խորհրդարանի խոսանկի բարեկամը։ -0-