Երևանում կհայտնվի ԽՍՀՄ զրահատանկային զորքերի գլխավոր մարշալ Համազասպ Բաբաջանյանի բրոնզե կիսանդրին

Երևանում կտեղադրվի ԽՍՀՄ զրահատանկային զորքերի գլխավոր մարշալ Համազասպ Բաբաջանյանի բրոնզե կիսանդրին՝ գրանիտե պատվանդանի վրա, «Նովոստի-Արմենիա» գործակալությանը հայտնեցին ՀՀ Պաշտպանության նախարարությունից:

Հաղորդագրության մեջ ասվում է, որ ՀՀ պաշտպանության նախարարությունը, Խորհրդային միության զրահատանկային զորքերի գլխավոր մարշալ Համազասպ Բաբաջանյանի գրանիտե պատվանդանի վրա բրոնզե կիսանդրու` գիպսե, 0.5 մ բարձրությամբ աշխատանքային մակետ, Երևանի Ավան համայնքի տարածքում հուշարձանի տեղադրման էսքիզային գծապատկեր և հուշարձանի կառուցման գնային առաջարկ ստանալու նպատակով հայտարարում է մրցույթ:

Մրցույթի մասնակիցները, սույն հայտարարությամբ պահանջվող աշխատանքները մինչև 2009թ. հուլիսի 1-ը, ժամը 1200-ն, պետք է ներկայացնեն ՀՀ պաշտպանության նախարարության նյութատեխնիկական ապահովման դեպարտամենտի տնտեսագիտական վերլուծության և գնումների փաստաթղթերի ձևակերպման վարչություն:

Մրցույթում հաղթող ճանաչված աշխատանքների հեղինակները ՀՀ պաշտպանության նախարարության կողմից կպարգևատրվեն`1-ին տեղ` մեկ աշխատանք- 3 000 ԱՄՆ դոլարին համաժեք դրամով, 2-րդ տեղ` մեկ աշխատանք - 1 000 ԱՄՆ դոլարին համաժեք դրամով, 3-րդ տեղ` մեկ աշխատանք - 500 ԱՄՆ դոլարին համաժեք դրամով:-0-