Հայաստանի ոստիկանությունը բերման է ենթարկել մի կնոջ սպանության և անդամահատության մեջ կասակածվող անձին

ԵՐԵՎԱՆ, 20 մայիսի. /Նովոստի-Արմենիա/. Ոստիկանության աշխատակիցները բերման են ենթարկվել նախկինում չորս անգամ ազատազրկման դատապարտված, 1952 թ. ծնված Հովհաննես Օրջանյանին, ում կասկածում են մի կնոջ սպանության և անդամահատության մեջ, «Նովոստի-Արմենիա» գործակալությանը հայտնեցին ՀՀ ոստիկանության մամուլի ծառայությունից:

Մայիսի 10-ին Քանաքեռհէկ-ի 1-ին հիդրոտուրբինի մաքրման աշխատանքների ժամանակ, ջրի հատակից բարձրացվել է մոտ 40 տարեկան, գլխատված և վերջույթները կտրված կնոջ դիակ` որովայնի վրա վիրահատական սպիով

Ձեռնարկված միջոցառումների շնորհիվ դիակի ինքնությունը պարզվել է. ս/թ մայիսի 9-ից որպես անհայտ կորած, հետախուզվող, 1961 թ. ծնված Նունե Հովսեփյան:

«Ոստիկանության կազմակերպված հանցավորության դեմ պայքարի գլխավոր, Երևան քաղաքի վարչությունների և Արաբկիրի բաժնի աշխատակիցների ձեռնարկած համատեղ օպերատիվ- հետախուզական միջոցառումների արդյունքում, նշված սպանությունը կատարելու կասկածանքով, մայիսի 19-ին, ժամը 19.00-ին Կոմիտասի պողոտայի շենքերից մեկի մոտից բերման է ենթարկվել նախկինում չորս անգամ ազատազրկման դատապարտված, 1952 թ. ծնված Հովհաննես Օրջանյանը»,- ասված է հաղորդագրության մեջ:

Պարզվել է, որ վերջինս ս/թ մայիսի 8-ին, ժամը 23.00-ից մինչև 24.00-ն ընկած ժամանակահատվածում, Կոմիտասի պողոտայի թիվ 35 շենքի մոտից Ն.Հովսեփյանին նստեցրել է իր «Ռենո» մակնիշի ավտոմեքենան և մեկնել Քանաքեռ Շրջանցիկ թունելի «Մորիսի Աղբյուր» կոչվող հատված: Ծագած վիճաբանության ժամանակ ծեծի է ենթարկել նրան և սպանել, որից հետո հետքերը թաքցնելու նպատակով, դիակը անդամահատել է և դնելով պարկի մեջ նետել Սևան-Հրազդան ջրատարը:

Դեպքի հանգամանքների վերականգնման նպատակով կատարվել է համապատասխան փորձարարություններ:

Օրջանյանը ձերբակալված է:-0-