«Արևելյան գործընկերությունում» Հայաստանի մասնակցության աստիճանը կախված է հենց երկրից. ԵՄ ներկայացուցիչ
ԵՄ «Արևելյան գործընկերություն» ծրագրում Հայաստանի մասնակցության աստիճանը կախված է հենց երկրից, կարծում է Եվրամիությունում նախագահող երկրի ներկայացուցիչ, Հայաստանում Լեհաստանի արտակարգ և լիազոր դեսպան Տոմաշ Քնոթեն։
«Դա կախված կլինի Հայաստանից, «Արևելյան գործընկերությունում» նրա դերակատարությունից», - հայտարարեց նա չորեքշաբթի լրագրողներին։
«Արևելյան գործընկերությունը» լեհ-շվեդական նախաձեռնություն է՝ հետխորհրդային երկրների հետ ԵՄ հարաբերությունների բարելավմանն ուղղված հարևանության քաղաքականության շրջանակներում։ Դրա կազմում են Հայաստանը, Ուկրաինան, Բելառուսը, Վրաստանը, Ադրբեջանն ու Մոլդովան։ Ծրագրի շրջանակներում 2009-2013 թթ.-ին ԵՄ-ն այդ երկրների 600 միլիոն եվրո կտրամադրի։
Քնոթեի խոսքերով՝ «Արևելյան գործընկերությունն» իր մասնակիցներին հնարավորություն է տալիս ընդլայնել կապերը ԵՄ-ի հետ, համագործակցության նոր հնարավորություններ է տրամադրում։
Առաջին հերթին՝ դա համագործակցություն է տնտեսական ոլորտում, որը ապագայում կարող է հանգեցնել ազատ առևտրի ռեժիմի ԵՄ-ի և գործընկերության մասնակիցների միջև։
Նա նշեց, որ դա, մասնավորապես, կնպաստի դեպի ԵՄ ապրանքների արտահանմանը և գործընկերության երկրների տնտեսություն արվող ներդրումներին։
Քնոթեն նշեց, որ դա հատկապես շահավետ կլինի Հայաստանի համար՝ միաժամանակ ավելացնելով, որ այս կապակցությամբ Հայաստանը, ինչպես նաև ծրագրի այլ երկրներ, պետք է իրենց օրենսդրությունը, մասնավորապես, սանիտարական նորմերը համապատասխանեցնեն ԵՄ նորմերի հետ։
Դեսպանի կարծիքով՝ «Արևելյան գործընկերության» երկրորդ կարևոր առավելությունն այն է, որ ծրագիրը պատրաստում է մասնակից պետություններին ԵՄ-ին հնարավոր անդամակցությանը, «ինչը հատկապես կարևոր է այն երկրների համար, որոնք ծրագրում են անել դա ապագայում»։
Միաժամանակ նա ընդգծեց, որ դա չի նշանակում, որ այդ երկրները պարտադիր կմտնեն Եվրամիություն։ «Դա ուղղակի ԵՄ մտնելու հնարավորություն է։ Դրա համար երկար տարիների ծանր աշխատանքներ են անհրաժեշտ, այն շատ երկար և ծանր գործընթաց է», - հայտարարեց դեսպանը՝ նշելով, որ Լեհաստանը ևս ստիպված է եղել անցնել այդ գործընթացի միջով։
Նա ընդգծեց, որ անդամակցությամբ պետք է շահագրգռված լինեն նաև այդ երկրների հասարակությունները, այլ ոչ թե միայն իշխանությունները։
Հայաստանում Եվրոպական շարժման նախագահ Վիկտոր Ենգիբարյանն իր հերթին նշեց, որ այժմ Հայաստանը պատրաստ չէ նման հնարավորության, սակայն 3-5 տարի անց իշխանությունների կողմից այդ ուղղությամբ արվող վճռական քայլերի դեպքում կարելի կլինի խոսել դրա մասին։
Քնոթեի կարծիքով՝ «Արևելյան գործընկերության» մեկ այլ առավելությունը ԵՄ-ի և ծրագրի մասնակից-երկրների միջև մուտքի արտոնագրի ռեժիմի դյուրացումն է։
Դեսպանը ևս մեկ անգամ ընդգծեց, որ «Արևելյան գործընկերությունն» ուղղված չէ Ռուսաստանի դեմ։ Նա նշեց, որ Ռուսաստանը ԵՄ-ի հետ համագործակցության սեփական ծրագիրն ունի։-0-
