Արգենտինան հրաժարվել է մասնակցել Երևանում կայանալիք ԱԻԲԱ բռնցքամարտի աշխարհի պատանիների 2009թ. առաջնությանը

Արգենտինան պաշտոնապես հրաժարվել է մասնակցել Երևանում մայիսի 23-30-ը կայանալիք ԱԻԲԱ բռնցքամարտի աշխարհի պատանիների 2009թ. առաջնությանը, հաղորդում է ՀՀ բռնցքամարտի ֆեդերացիայի մամուլի կենտրոնը։

«Հայաստանի բռնցքամարտի ֆեդերացիային հղած պաշտոնական նամակի համաձայն` հրաժարվելու պատճառները վարչական խնդիրներն են», - ասվում է տեղեկատվության մեջ։

Արգենտինան առաջնությանը մասնակցելու հրավերին արձագանքած առաջին երկրներից էր, որը պատրաստվում էր Երևան ուղարկել 3 մարզիկի:

Երեքշաբթի օրվա դրությամբ առաջնությանը մտադիր է մասնակցել 50 երկիր՝ Ալժիրը, Ավստրալիան, Բելառուսը, Հայաստանը, Բոցվանան, Բուլղարիան, Չինաստանը, Տայվանը,  Խորվաթիան, Կուբան, Չեխիան, Կիպրոսը, Դոմինիկյան Հանրապետությունը, Էկվադորը, Անգլիան, Ֆինլանդիան, Գերմանիան, Վրաստանը, Գանան, Հունաստանը, Հունգարիան, Հնդկաստանը, Իրանը, Իռլանդիան, Իսրայելը, Ղազախստանը, Ղրղզստանը, Կորեան, Լատվիան, Լիտվան, Մարոկկոն, Մոլդովան, Մոնղոլիան, Մոնտենեգրոն, Նիգերիան, Լեհաստանը, Պուերտո-Ռիկոն, Ռումինիան, Ռուսաստանը, Սլովակիան, Շվեդիան, Թայլանդը, Թունիսը, Թուրքիան, Թուրքմենստանը, Ուկրաինան, ԱՄՆ-ն, Ուզբեկստանը, Վենեսուելան, Սերբիան։

Բլոր 13 քաշային կատեգորիաներում բռնցքամարտիկներին պատրաստվում է ռինգ դուրս հանել միայն յոթ երկիր՝ Հայաստանը, Թուրքիան, Ուկրաինան, Ռուսաստանը, Հունգարիան, Բելառուսն ու ԱՄՆ-ն:

Աշխարհի առաջնության ընթացքում Հայաստան կայցելեն AIBA-ի նախագահ Չինգ-Կոու Վուն, գործադիր տնօրեն Հո Կիմը, Սիրողական բռնցքամարտի համաշխարհային ասոցիացիայի փոխնախագահ, Բռնցքամարտի եվրոպական համադաշնության նախագահ Յումբեր Ֆուրժոնին, AIBA-ի գործադիր փոխտնօրեն Հոֆուր Ռախիմովը, ինչպես նաև Ռուսաստանի բռնցքամարտի ֆեդերացիայի նախագահ, Պահպանության դաշնային ծառայության տնօրեն, բանակի գեներալ Եվգենի Մուրովը։-0-