Պարզվել է «Նաիրիտ» քիմգործարանի պայթյունի արդյունքում զոհված երեք մարդու ինքնությունը

ԵՐԵՎԱՆ, 18 մայիսի. /Նովոստի-Արմենիա/. Պարզվել է «Նաիրիտ» քիմգործարանի պայթյունի արդյունքում զոհված երեք մարդու ինքնությունը, որոնց մարմինները մայիսի 14-ին դիահերձարան էին ուղարկվել, երկուշաբթի տեղեկացվում է ՀՀ ոստիկանության պաշտոնական կայքում։ 

Տարածաշրջանում կաուչուկի արտադրության հսկա՝ «Նաիրիտ» քիմգործարանում մայիսի 14-ին տեղական ժամանակով 18։40-ի շրջանում՝ երկրորդ հերթափոխի սկզբին տեղի ունեցավ պայթյուն։ Հրդեհի արդյունքում զոհվեց գործարանի 4 աշխատակից։  

Հաղորդագրության համաձայն, երեք զոհվածներն են 39-ամյա Արթուր Կարապետյանը, ինչպես նաև 50-ամյա Վահան Ղարիբյանն ու Լևոն Լևոնյանը։  

Մայիսի 15-ին արդյունաբերական արտադրամասում, որտեղ ևս պայթյուն էր տեղի ունեցել, հայտնաբերվել է 51-ամյա Հովհաննես Հովհաննիսյանի մարմինը, որը ևս դիահերձարան է ուղարկվել։ 

Երևանի «Նաիրիտ» քիմգործարանում տեղի ունեցած հրդեհի փաստի առթիվ հարուցվել է քրեական գործ ՀՀ Քրեական օրենսգրքի երկու հոդվածի՝ 231-րդ հոդվածի (պայթյունավտանգ օբյեկտներում անվտանգության կանոնների խախտելը, եթե մարդու առողջությանն անզգուշությամբ պատճառվել է ծանր կամ միջին ծանրության վտաս) և 285-րդ հոդվածի (վտանգավոր քիմիական կամ կենսաբանական այլ ազդակների կամ թունավոր նյութերի հետ վարվելու ընթացքում անվտանգության կանոնները խախտելը, եթե դա անզգուշությամբ մարդու առողջությանը վնաս է պատճառել, առաջացրել է համաճարակներ կամ անասնահամաճարակներ կամ այլ ծանր հետևանքներ) հատկանիշներով:

«Նաիրիտ» գիտաարտարդրական միավորումը ԽՍՀՄ տարածքում քլորոպրենային կաուչուկի մենաշնորհային արտադրողն էր։ «Նաիրիտ» առևտրային անվանումով պոլիքլորոպրենը ձեռնարկությունն արտադրում է 1940 թվականից։ -0-