ԵՐԵՎԱՆ, 18 մայիսի. /Նովոստի-Արմենիա/. ՀՀ ոստիկանությունը հայտնաբերել ամերիկահայ Նազարեթ-Հագոփ Բերբերյանի մարմինը՝ բռնության հետքերով, երկուշաբթի «Նովոստի-Արմենիա» գործակալությանը տեղեկացրեցին ՀՀ ոստիկանության մամուլի ծառայությունից։
2009 թ.-ի ապրիլի 25-ին տեղական ժամանակով ժամը 20։00-ին ԱՄՆ քաղաքացի 57-ամյա գործարար Նազարեթ-Հագոփ Բերբերյանը դուրս էր եկել Ամիրյան փողոցի վրա գտնվող իր տանից և չէր վերադարձել։
Միաժամանակ Բերբերյանին պատկանող մուգ կանաչ Toyota Land Crusier ավտոմեքենան հայտնաբերվել էր «Զվարթնոց» օդանավակայանի ավտոկանգառում։ ԱՄՆ-ում բնակվող Բերբերյանին ընտանիքը 250 հազար ԱՄՆ դոլար դրամական պարգև էր խոստացել Բերբերյանի գտնվելու վայրի մասին տեղեկություններ հաղորդելու համար։
«Ոստիկանության ԿՀԴՊ ԳՎ, Երևան քաղաքի վարչության ՔՀԲ, ԱԱԾ ԿՀԴՊ բաժնի և ոստիկանության Երևանի քննչական վարչության աշխատակիցների ձեռնարկած համատեղ միջոցառումների շնորհիվ մայիսի 15-ին Երևան-Սևան մայրուղու 25,5 կմ հատվածում, ճամփեզրի ձորակում հայտնաբերվել է Նազարեթ-Հագոփ Բերբերյանի դիակը` բռնության հետքերով», - տեղեկացրեցին ոստիկանությունից։
Քննությունը վարում է Երևան քաղաքի քննչական վարչությունը:
Նախաքննության շահերից ելնելով` դեպքի հանգամանքները և հանցագործություն կատարածների անունները չեն հրապարակվում:
Բերբերյանը Երևանի կենտրոնում Աբովյան և Պուշկին փողոցների խաչմերուկում գտնվող premium դասի անշարժ գույքի սեփականատերն է։ Ձեռներեցը նաև կառուցում է հյուրանոց արտադրական օբյեկտում՝ «Linareh Company» անվանումով։ Նա նաև Արարատի մարզի Դալար գյուղում գտնվող գորգագործական գործարանի սեփականատերն է։
Դեպքի առթիվ դեռևս մայիսի 5-ին հարուցվել էր քրեական գործ` Քր. օր.-ի 104 հոդվածի 1-ին մասի (սպանություն) հատկանիշներով:-0-
