ՀՀ նախագահ Սերժ Սարգսյանը ուրբաթ 2008 թ.-ի մրցանակ է հանձնել գիտության, գրականության և արվեստի 21 գործչի։
«Ձեր ձեռքբերումներն ու նվաճումներն իրականում այլևս ձեզ չեն պատկանում, դրանք մեր ողջ ժողովրդինն են։ Արվեստագետի և գիտնականի ամենաբարձր նպատակը, կարծում եմ, հենց դա պետք է լինի. ստեղծել արժեք, որ սկսում է ապրել ինքնուրույն կյանքով և դառնում համընդհանուր սեփականություն։ Հատկապես այսօր, երբ հասարակություն կարիք ունի դրական և հուսադրող օրինակների», - ասել է ՀՀ նախագահը։
Նա նշել է, որ իր համար առանձնապես թանկ են երիտասարդական մրցանակները, որոնք մի կողմից խորհրդանշում են սերունդների հերթագայությունը, իսկ մյուս կողմից օրինակ են բոլոր երիտասարդների համար։
«Իմ պարտքն եմ համարում հատուկ անդրադառնալ մեր այն մրցանակակիրներին, ովքեր պարգևատրվել են Հայոց ցեղասպանության միջազգային ճանաչման ու դատապարտման գործին լուրջ ավանդ բերելու համար։ Սա այն ասպարեզն է, որտեղ դեռ մեծ անելիքներ կան», - ասել է նախագահը։
Սարգսյանի խոսքերով՝ ցեղասպանությունը ոճիր է մարդկության դեմ, և այդ աշխատանքը երբեք չի կորցնելու հասարակական ու միջազգային հնչեղությունը։
Հայոց ցեղասպանության միջազգային ճանաչման գործին լուրջ ավանդ բերելու համար նախագահական մրցանակի է արժանացել Վահագն Տատրյանը (ԱՄՆ)՝ Հայոց ցեղասպանության ուսումնասիրման գործում զգալի գիտական ներդրման համար, Վոլֆգանգ Գուստը (Գերմանիա)՝ Հայոց ցեղասպանության վերաբերյալ գերմանական արխիվային փաստաթղթերի գիտական շրջանառության մեջ մտցնելու և դրանց վերլուծության համար։
Հայոց Ցեղասպանությունը ХХ դարի առաջին ցեղասպանությունն է։ Ցեղասպանության փաստը ճանաչել են բազմաթիվ երկրներ, մասնավորապես, Ուրուգվայը, Լիտվան, Ռուսաստանը, Ֆրանսիան, Իտալիայի խորհրդարանի ստորին պալատը, ԱՄՆ-ի մեծ թվով նահանգներ, ինչպես նաև Հունաստանի, Կիպրոսի, Արգենտինայի, Բելգիայի, Ուելսի խորհրդարանները, Շվեյցարիայի ազգային խորհուրդը, Կանադայի խորհրդարանի համայնքների պալատը և Լեհաստանի սեյմը։
ՀՀ նախագահը ցավով է նշել, որ կան ասպարեզներ, որտեղ մրցանակներն այս տարի իրենց տերերին չեն գտել՝ հիշատակելով առողջապահության և հումանիտար գիտությունների ասպարեզները, մարդասիրական արժեքների տարածման ծրագրերն ու գրականության ասպարեզի երիտասարդական մրցանակները։
«Սա վկայում է մեր հանձնաժողովների խստապահանջության մասին, բայց հուսով եմ, որ հաջորդ տարի մենք կունենանք իսկապես արժանավոր մրցանակակիրներ նաև այդ ասպարեզներում», - ասել է Սարգսյանը։-0-
