ԵՐԵՎԱՆ, 6 մայիսի. /Նովոստի-Արմենիա/. «Արևելյան գործընկերություն» ծրագրին մասնակցելը Հայաստանը դիտարկում է որպես Եվրոպայի հետ մերձեցման հնարավորություն, չորեքշաբթի լրագրողներին ասաց ՀՀ փոխարտգործնախարար Կարինե Ղազինյանը:
«Ծրագրի գաղափարը Եվրոպայի հետ հուսալի, կայուն և համագործակցող հարևանների առկայությունն է, երբ հիմնական գործընկերությունը կկենտրոնանա ժողովրդավարության, էներգետիիկ անվտանգության, շուկայական տնտեսության և գործընկեր երկրներում կայուն զարգացում ապահովելու ուղղությամբ»,- ասաց Ղազինյանը «Նովոստի» մամուլի կենտրոնում:
Նա նշեց, որ տնտեսական համագործակցությունը խթանելու համար ծրագրվում է եվրոպական հարևանության քաղաքականության շրջանակներում համագործակցության առավել խորացված ձևաչափով ստեղծել ազատ առևտրի գոտի:
«Ծրագիրը քայլ առաջ է եվրոպական հարևանության ծրագրի համեմատ, սակայն միաժամանակ դա ԵՄ ավտոմատ անդամակցություն չի նշանակում, թեև յուրաքանչյուր երկրի հետ կտարվի սերտ համագործակցություն, ինչի կապակցությամբ Հայաստանը առանձին օրակարգ կմշակի բոլոր առումներով՝ սկսած իշխանական և ավարտած հասարակական կառույցներով»,- ասաց Ղազինյանը։
Փոխնախարարը նշեց, որ «Արևելյան գործընկերությունը» կիրականացվի ինչպես երկկողմ, այնպես էլ բազմակողմանի ձևաչափով ԵՄ բոլոր երկրների հետ։
Միաժամանակ երկկողմ ձևաչափը ենթադրում է հիմքերի ստեղծում համաձայնագրեր ստորագրելու համար ԵՄ և ծրագրի անդամ-երկրներից յուրաքանչյուրի հետ, ինչին Հայաստանը հատուկ կարևորություն է տալիս։
«Համաձայնագրերը կստորագրվեն այն երկրների հետ, որոնք էական առաջընթաց կգրանցեն բոլոր հիմնական ուղղություններով՝ սկսած ժողովրդավարությունից մինչև արդյունավետ կառավարման ոլորտը։ Նոր համաձայանգրերը դիվերսիֆիկացված կլինեն երկրներից յուրաքանչյուրով, որն ինքնուրույն կընտրի զարգացման ուղիները»,- ասաց Ղազինյանը։
Բազմակողմանի ձևաչափը, նրա խոսքերով, կգործի մասնակիցների համատեղ որոշումների հիման վրա չորս հիմնական պլատֆորմներով՝ ժողովրդավարություն, կայունություն և լավ կառավարում, տնտեսական ինտեգրում և մերձեցում ԵՄ քաղաքականության հետ, էներգետիկ անվտանգություն, բնակչության շփումները։
«Արևելյան գործընկերություն» ծրագրով նախատեսված ընդհանուր գումարը մինչև 2013 թվականը կազմում է 600 մլն դոլար։ Լրացուցիչ միջոցների անհրաժեշտության դեպքում կներգրավվեն տարբեր դոնոր և մասնավոր կազմակերպություններ։
«Առանձին երկրների, այդ թվում նաև Հայաստանի մասով, առայժմ որևէ միջոց նախատասված չէ։ Դրանք կբաշխվեն ծրագրի մեկնարկից հետո բանակցությունների արդյունքում»,-ասաց Ղազինյանը։
ԵՄ նախագահող երկիր Չեխիայի հրավերով մայիսի 7-ին Պրահայում տեղի կունենա գագաթնաժողով, որտեղ ԵՄ անդամ-երկրների և Արևելյան Եվրոպայի վեց երկրների՝ Հայաստանի, Վրաստանի, Ադրբեջանի, Մոլդովայի, Ուկրաինայի և Բելառուսի կառավարությունների ղեկավարները կընդունեն հռչակագիր՝ հայտարարելով «Արևելյան գործընկերության» ծրագրի մեկնարկը։ -0-
