ԱՄՆ-ն պատիվ է համարում օգնելՀայաստանին Թուրքիայի հետ հարաբերությունների նորմալացման և Ղարաբաղյան հակամարտության կարգավորման հարցում, նախօրեին ՀՀ արտգործնախարար Էդվարդ Նալբանդյանի հետ դեմ առ դեմ հանդիպումից առաջ ասել է ԱՄՆ պետքարտուղար Հիլարի Քլինթոնը, հայտնվում է ԱՄՆ պետդեպարտամենտի կայքում։
ՀՀ արտգործնախարար Էդվարդ Նալբանդյանը ԱՄՆ պետքարտուղար Հիլարի Քլինթոնի հրավերով այցով գտնվում է Վաշինգտոնում։
«Շատ հաճելի է այսօր այստեղ ողջունել ՀՀ արտգործնախարարին։ ԱՄՆ և Հայաստանի միջև հարաբերությունները երկարատև են ու տևական»,-ասել է Քլինթոնը։
Նա հավաստել է, որ նախագահ Օբամայի վարչակազմը հակված է ընդլայնել ու խորացնել հարաբերությունները Հայաստանի հետ՝ օգնելով նրան զարգացման ու նվաճումների շարունակման գործում։
Իր կողմից ՀՀ ԱԳՆ ղեկավար Էդվարդ Նալբանդյանը նշել է, որ այս հանդիպումը լավ հնարավորություն է առաջ տանելու հարաբերությունների երկկողմ օրակարգն ու քննարկելու հարցերի լայն շրջանակ։
«Մենք մտադիր ենք ամրացնել, խորացնել ու ընդլայնել մեր բարեկամական գործընկերությունը Միացյալ նահանգների հետ։ Սա Վաշինգտոն իմ այցի հիմնական նպատակն է։ Եվ ես կուզենայի օգտագործել այս հնարավորությունը ԱՄՆ վարչակազմին, պետքարտուղարին և պետդեպարտամենտին իմ երախտագիտությունը հայտնելու Թուրքիայի հետ հարաբերությունների նորմալացման գործընթացին և Լեռնային Ղարաբաղի հակամարտության խաղաղ կարգավորմանն աջակցելու շարունակական ջանքերի համար»,- ասել է Նալբանդյանը։ -0-
