Ռուս ականավոր բալետմեյստեր Յուրի Գրիգորովիչը երեքշաբթի Երևանում հայտարարեց լրագրողներին, որ երազել է Արամ Խաչատրյանի «Սպարտակ» բալետը բեմադրել հեղինակի հայրենիքում։
Երեքշաբթի Երևանում տեղի ունեցավ Արամ Խաչատրյանի «Սպարտակ» բալետի պրեմիերան՝ Հայաստանի և Ռուսաստանի առաջին տիկնանց՝ Ռիտա Սարգսյանի և Սվետլանա Մեդվեդևայի բարձր հովանու ներքո:
«Սպարտակ» բալետի բեմադրիչն է ԽՍՀՄ ժողովրդական արտիստ, Սոցիալիստական աշխատանքի հերոս, Լենինյան և պետական մրցանակների դափնեկիր, աշխարհահռչակ բալետմեյստեր Յուրի Գրիգորովիչը:
Բալետմեյստերը նշեց, որ ինքը շատ սիրել Խաչատրյանի երաժշտությունը, այդ իսկ պատճառով որոշել է բեմադրել նրա ստեղծագործությունը։ «Երբ լսում ես Խաչատրյանի երաժշտությունը, պարել ես ուզում»,- ասաց նա։
Մամուլի ասուլիսի ժամանակ բալետմեյստերը պատմեց պրեմիերայի պատրաստությունների ընթացքում ծագած դժվարությունների, մասնավորապես տղամարդ արտիստների պակասության մասին։
Նրա խոսքերով՝ ստիպված են եղել դիմել ՀՀ պաշտպանության նախարարություն, որպեսզի գերատեսչությունը թույլատրի ժամկետային զինվորական ծառայություն անցնող մի քանի պարողների մասնակցել բեմադրությանը։
Գրիգորովիչը նշեց նաև Մոսկվայի Մեծ թատրոնի օգնությունը «Սպարտակ» բեմադրության ժամանակ, որն արտահայտվեց ռեպետիտորների և լուսավորության մասնագետների տրամադրմամբ։
ՀՀ Մշակույթի նախարար Հասմիկ Պողոսյանը շնորհակալություն հայտնեց բոլորին, ովքեր աջակցել են Հայաստանում «Սպարտակի» բեմադրմանը՝ հատուկ շնորհակալություն հայտնելով հովանավորներին։ Նա ընդգծեց, որ չնայած բեմադրությունը շատ թանկարժեք է, բյուջեից հատկացվել է ընդամենը 20 մլն. դրամ (53.7 հազար դոլար), իսկ մնացած գումարը տրամադրել են հովանավորները։
Իր կողմից հովանավորներից մեկը՝ «Ռոսգոսստրախ-Արմենիա» ընկերության գործադիր տնօրեն Գագիկ Գրիգորյանը հայտարարեց, որ բոլոր դժվարություններն արդեն ետևում են։ «Մեր մեծ հայրենակիցն արդեն գրել է ստեղծագործությունը, մեր մեծ ժամանակակիցը համաձայնել է այն բեմադրել, մշակույթի նախարարությունը ևս հսկայական աշխատանք է կատարել»,-ասաց նա։
«Սպարտակ» բալետի առաջին բեմադրությունն իրականացվել է Լենինգրադի օպերայի և բալետի թատրոնի կողմից (այժմ՝ Մարիինյան թատրոն) 1956 թ.-ի դեկտեմբերի 27-ին (բալետմեյստեր՝ Լ.Յակոբսոն, դիրիժոր՝ Պ.Ֆելդթ)։ «Սպարտակ» բալետի համար Արամ Խաչատրյանը Լենինյան մրցանակի է արժանացել։ -0-
