Վալերի Գերգիևն առաջին անգամ վարպետության դաս անցկացրեց Հայաստանում

ԵՐԵՎԱՆ, 5 մայիսի. /Նովոստի-Արմենիա/. Ռուս անվանի դիրիժոր Վալերի Գերգիևը առաջին անգամ վարպետության դաս տվեց Հայաստանում։ Երկուշաբթի երեկոյան Երևանի կոնսերվատորիայի շենքում նա վարպետության դաս անցկացրեց Հայաստանի պետական երիտասարդական նվագախմբի համար։  

Հայ երաժիշտները մաեստրոյի առաջ կատարեցին Էդվարդ Միրզոյանի «Սիմֆոնիայի» առաջին ու չորրորդ մասերը։ «Հայաստանում միշտ լավ երաժիշտներ եղել են, մեծ թվով լավ երաժիշտներ»,- ասաց Գերգիևը երիտասարդ երաժիշտներին մի քանի գործնական խորհուրդ տալուց առաջ։   

«Հայաստանում մեծ թվով լավ երաժշտություն է ստեղծվել, և ես կանեմ ամեն ինչ, որպեսզի դուք գաք Սանկտ Պետերբուրգ և ներկայացնեք այն»,- ավելացրեց մաեստրոն։

Հայաստանի երիտասարդական նվագախումբը հիմնադրվել է 2005 թ.-ի նոյեմբերին Երևանի պետական կոնսերվատորիայի ուսանողների ջանքերով։ Նվագախմբի գլխավոր դիրիժորը Սերգեյ Սմբատյանն է։ Այն Պետական երիտասարդական նվագախմբի կարգավիճակ ստացել է 2008 թ.-ի հունվարին։

Իր գոյության տարիների ընթացքում նվագախումբը հանդես է եկել համաշխարահային ճանաչում ունեցող այնպիսի երաժիշտների հետ, ինչպիսիք են Դենիս Մացուևը, Վադիմ Ռեպինը, համերգներ է տվել աշխարհի լավագույն համերգասրահներում։ -0-