ՀՀ իրավապահ մարմինները պետք է բծախնդրորեն քննեն ընտրական խախտումների փաստերը. Սարգսյան
ԵՐԵՎԱՆ, 22 փետրվարի./Նովոստի-Արմենիա/. ՀՀ իրավապահ մարմինները պետք է բծախնդրորեն քննության առնեն բոլոր այն փաստերը, որոնք կապված են ընտրախախտումների հետ, այսօր կառավարության նիստը բացելով՝ հայտարարեց վարչապետ Սերժ Սարգսյանը։
«Մենք հավակնոտ ծրագրեր ունենք, և այդ ծրագրերը պետք է բերեն նրան, որ յուրաքանչյուր ամիս մեր ժողովուրդն իրոք զգա փոփոխություններ, պիտի բարեփոխումներն արագանան, սա կարևորագույն խնդիր է»,- ուրբաթ «Նովոստի-Արմենիային» հաղորդեցին ՀՀ կառավարության աշխատակազմի հասարակայնության հետ կապերի վարչությունից՝ մեջբերելով Սարգսյանի խոսքերը։
Վարչապետը չափազանց կարևոր է համարել նաև, որ կառավարության անդամներն անհապաղ ձեռնամուխ լինեն նախանշված ծրագրերի իրականացմանը:
Վարչապետը նաև շնորհակալություն է հայտնել կառավարության անդամներին և այն բոլոր քաղաքացիներին, ովքեր օժանդակել են փետրվարի 19-ին հանրապետությունում անցկացնելու ԵԱՀԿ-ի և Եվրամիության առջև ստանձնած պարտավորություններին համապատասխան ընտրություններ:
Փետրվարի 19-ին Հայաստանում տեղի ունեցան հերթական նախագահական ընտրությունները, որոնց մասնակցեց ինը թեկնածու։
Հայաստանի ԿԸՀ տվյալներով, ՀՀ վարչապետ Սերժ Սարգսյանը հավաքել է ձայների 52,86%-ը, իսկ ՀՀ նախկին նախագահ Լևոն Տեր-Պետրոսյանը՝ 21,5%-ը։
Երևանի կենտրոնում արդեն երրորդ օրն անընդմեջ հանրահավաքներ, երթեր, ինչպես նաև նստացույց և ուսանողական դասադուլ է տեղի ունենում՝ կազմակերպված ընդդիմության կողմից՝ ՀՀ առաջին նախագահ Լևոն Տեր-Պետրոսյանի գլխավորությամբ։
Դրա հետ մեկտեղ, ընտրություններում հաղթելու կապակցությամբ Սարգսյանին արդեն շնորհավորել են ՌԴ, Ֆրանսիայի, Վրաստանի, Բելառուսի և Բուլղարիայի նախագահները, ՀԱՊԿ գլխավոր քարտուղար Նիկոլայ Բորդյուժան, Ընդհանուր քաղաքականության և անվտանգության քաղաքականության գծով ԵՄ գերագույն ներկայացուցիչ Խավիեր Սոլանան։--0—
