ԱԳՆ. ՀՀ-ին չի տպավորում ղարաբաղյան հակամարտության շուրջ բանակցություններից Ադրբեջանի դուրս գալու սպառնալիքը

ԵՐԵՎԱՆ, 17 հուլիսի./Նովոստի-Արմենիա/. ԱԳՆ մամուլի քարտուղար Աննա Նաղդալյանն ի պատասխան «Ինտերֆաքս» լրատվականի հարցին, մեկնաբանել է ադրբեջանական ղեկավարության՝ խաղաղ բանակցային գործընթացի մասին օրերս արված հայտարարությունները:

Նա ընդգծել է, որ ղարաբաղյան հակամարտությունն ունի երեք կողմ, որոնք ստորագրել են հրադադարի համաձայնագրի ներքո:

«Նախկինում Ադրբեջանը բանակցում էր ինչպես Լեռնային Ղարաբաղի, այնպես էլ՝ Հայաստանի Հանրապետության հետ: Այնուհետև Ադրբեջանը մերժեց ԼՂ հետ բանակցելը: Եթե այժմ Ադրբեջանը հրաժարվում է Հայաստանի հետ բանակցելուց, ապա պարզ չէ, թե ում հետ է բանակցելու ԼՂ հակամարտության հարցով: Արդյոք մտադիր է վերսկսել իր բանակցությունները արցախյան կողմի հետ, թե ոչ, մենք չգիտենք»,- նշել է Նաղդալյանը:

ԱԳՆ մամուլի քարտուղարի խոսքով, Ադրբեջանը վերջին շրջանում փորձում է տարբեր փաթեթավորմամբ հանդես գալ պատերազմի սպառնալիքներով:

«Եթե բանակցություններից դուրս գալու իր սպառնալիքն այդ շարքից է, ապա դա մեզ ոչ զարմացնում է, ոչ էլ՝ տպավորում: Հայաստանը մերժում է սպառնալիքի լեզուն և հանդես է գալիս խնդրի խաղաղ կարգավորման դիրքերից»,- ամփոփել է Նաղդալյանը:-0-