ՀՀ ԱԺ փոխնախագահը կմասնակցի Բելառուսի նախագահի երդմնակալության արարողությանը

ԵՐԵՎԱՆ, 4 նոյեմբերի. /Նովոստի–Արմենիա/. ՀՀ Ազգային ժողովի փոխնախագահ Էդուարդ Շարմազանովը նոյեմբերի 5-7-ը աշխատանքային այցով կմեկնի Մինսկ՝ մասնակցելու Բելառուսի Հանրապետության նախագահ Ալեքսանդր Լուկաշենկոյի երդմնակալության արարողությանը, հաղորդեցին ԱԺ մամուլի ծառայությունից:

Այցի շրջանակում նախատեսվում են ԱԺ փոխնախագահի հանդիպումները ԲՀ Ազգային ժողովի Ներկայացուցիչների պալատի նախագահ Վլադիմիր Անդրեյչենկոյի, ինչպես նաեւ ԲՀ Ազգային ժողովի Ներկայացուցիչների պալատի փոխնախագահ, ԲՀ Ազգային ժողովի և ՀՀ Ազգային ժողովի միջեւ համագործակցության միջխորհրդարանական հանձնաժողովի համանախագահ Վիկտոր Գումինսկիի հետ:

Բելառուսի Հանրապետության նախագահ Ալեքսանդր Լուկաշենկոյի երդմնակալության արարողությունը նախատեսված է նոյեմբերի 6-ին:-0-