Երևանի և Մոսկվայի առաջ ծառացած են ընդհանուր մարտահրավերներ, բայց կան նաև ընդհանուր հնարավորություններ. Փաշինյանը` Միշուստինին

ԵՐԵՎԱՆ, 20 ապրիլի./Նովոստի–Արմենիա/. ՀՀ վարչապետ Նիկոլ Փաշինյանը կարծում է, որ Երևանի և Մոսկվայի առաջ ծառացած են ընդհանուր մարտահրավերներ, բայց կան նաև ընդհանուր հնարավորություններ։


«Երեկ մենք Վլադիմիր Պուտինի հետ պայմանավորվել ենք, որ Հայաստանի և Ռուսաստանի միջկառավարական խորհուրդը պետք է դառնա հիմնական հարթակ այն պայմանավորվածությունների իրականացման համար, որոնք մենք ձեռք ենք բերել տնտեսության, էներգետիկայի և այլ ոլորտներում։ Ընթացիկ իրավիճակում մենք ունենք ընդհանուր մարտահրավերներ, բայց կան նաև հնարավորություններ, որոնք պետք է արձանագրել և փորձել օգտագործել», – հայտարարել է Փաշինյանն այսօր ՌԴ վարչապետ Միխայիլ Միշուստինի հետ Մոսկվայում կայացած հանդիպման ժամանակ։

Փաշինյանը շնորհակալություն է հայտնել ՌԴ կառավարությանը Հայաստանի պարենային անվտանգության ամրապնդմանն ուղղված գործողությունների համար, հաղորդում է ՏԱՍՍ–ը։

Նա նաև հայտարարել է, որ նախօրեին Պուտինի հետ կայացած բանակցությունների ժամանակ ձեռք են բերվել կարևոր պայմանավորվածություններ։–0–