Վրաստանի վարչապետը պարզաբանել է, թե ինչու իր երկիրը չի միանա ՌԴ–ի դեմ կիրառվող պատժամիջոցներին

ԵՐԵՎԱՆ, 28 փետրվարի./Նովոստի–Արմենիա/. Վրաստանի վարչապետ Իրակլի Ղարիբաշվիլին պարզաբանել է, որ ՌԴ–ի դեմ Արևմուտքի ֆինանսական պատժամիջոցներին միանալու դեպքում լուրջ վնաս կկրեն երկրի գինեգործները, արտահանողները, ֆերմերները, կտուժի տուրիզմը, դա «վնաս է ազգային շահերին»։

«Երբ խոսքը պատժամիջոցների մասին է, այս գործընթացին ներգրավված են հազարավոր գինեգործներ, արտահանողներ, ֆերմերներ։ Ի՞նչ են ինձնից պահանջում։ Որպեսզի ես սեփական ժողովրդիս նկատմամբ պատժամիջոցնե՞ր կիրառեմ։ Այդ ավելորդ էմոցիաները ոչինչ չեն տա, դա վնաս է մեր ազգային շահերին», – հայտարարել է Վրաստանի վարչապետը կառավարության նիստի ժամանակ, հաղորդում է ՌԻԱ Նովոստին։

Ղարիբաշվիլու խոսքով, 2008թ.–ի հակամարտությունից հետո Վրաստանի այն ժամանակվա նախագահ Միխայիլ Սահակաշվիլին և նրա կառավարությունն ուղիներ էին փնտրում` Ռուսաստանի հետ առևտրային հարաբերությունները վերականգնելու և ռուսական շուկան բացելու համար, իսկ պատերազմից հետո Սահակաշվիլին ռուսական ընկերություններին վաճառեց գրեթե բոլոր ռազմավարական օբյեկտները։

«Մեր խելամիտ, ազգային և հայրենասիրական քաղաքականության շնորհիվ մենք հասանք ամեն ինչի` ԵՄ–ի հետ ասոցացման համաձայնագիր, առանց վիզայի ռեժիմ և առաջընթաց այլ ոլորտներում, այդ թվում` ռուսական շուկայի բացում», – հայտարարել է Ղարիբաշվիլին։

Վրաստանի վարչապետը նշել է, որ ռուսական շուկայի բացումից հետո` 2013–2021թթ.–ին Վրաստանից Ռուսաստան է արտահանվել 2 մլրդ դոլարի գյուղմթերք, այլ արտադրանքի արտահանումը կազմում է 3 մլրդ դոլար։ Նրա խոսքով, տուրիզմի հաշվին վերջին հինգ տարում երկիրը ստացել է 3 մլրդ դոլարի եկամուտ` Ռուսաստանից ավելի քան 5 մլն զբոսաշրջիկ է այցելել Վրաստան։ Վարչապետը նաև ավելացրել է, որ Ռուսաստանում բնակվում է մոտ 1 մլն վրացի, տարեկան դրամական փոխանցումները կազմում են 500 մլն դոլար։–0–