Փաշինյանը, հնարավոր է, այցելի Անթալիա՝ մասնակցելու դիվանագիտական համաժողովին. Թուրքիայի փոխնախագահ

ԵՐԵՎԱՆ, 4 փետրվարի./Նովոստի-Արմենիա/. ՀՀ վարչապետ Նիկոլ Փաշինյանը, հնարավոր է, մարտին այցելի Թուրքիա՝ Անթալիայում անցկացվող դիվանագիտական համաժողովին մասնակցելու համար: Ուրբաթ նման հավանականության մասին է տեղեկացրել Թուրքիայի փոխնախագահ Ֆուաթ Օքթայը A Haber հեռուստաալիքին տված հարցազրույցում, հաղորդում է ՏԱՍՍ-ը:

«Չնայած վերջերս «Ղարաբաղի ազատագրումն» ու գործընթացը, որին մենք մինչև վերջ աջակցում ենք, ընկալվում են որպես պատերազմ, իրականում դա բանալի է դեպի խաղաղություն: Նշանակվել են հատուկ ներկայացուցիչներ, արվել են փոխադարձ դրական ուղերձներ: Մենք ուզում ենք, որպեսզի այդ գործընթացն արագանա», ասել է քաղաքական գործիչը՝ նշելով, որ ՀՀ վարչապետ Փաշինյանը կայցելի Անթալիա՝ մասնակցելու դիվանագիտական համաժողովին:

Ավելի վաղ հայտնի էր դարձել, որ ՀՀ ԱԳ նախարար Արարատ Միրզոյանը և Թուրքիայի հետ երկխոսության հատուկ ներկայացուցիչ, ԱԺ փոխնախագահ Ռուբեն Ռուբինյանը հրավեր են ստացել Անկարայից՝ մասնակցելու մարտի 11-13-ն անցկացվող Անթալիայի դիվանագիտական համաժողովին: Միրզոյանի խոսքով, նրա մասնակցության հարցով վերջնական որոշում դեռ չի ընդունվել:

Փաշինյանի դիրքորոշումը

Ավելի վաղ Փաշինյանը չէր բացառել, որ Հայաստանը կմասնակցի Անթալիայի համաժողովին: Նրա կարծիքով, եթե Երևանը խոսում է Անկարայի հետ երկխոսության մեկնարկի մասին, անտրամաբանական կլինի բաց թողնել այդ առիթը և հաղորդակցվելու հնարավորությունը:
Նա նաև հնարավոր էր համարել, որ Թուրքիայի հետ Հայաստանի դիվանագիտական հարաբերությունների հաստատմանը կարելի է հասնել մինչև այս տարվա վերջ: «Ամբողջ միջազգային հանրությունն օգնում է հայ-թուրքական հարաբերությունների կարգավորմանը՝ Ռուսաստանը, ԵՄ-ն, ԱՄՆ-ն, տարածաշրջանի երկրները» - ասել է Փաշինյանը:-0-