ԵՐԵՎԱՆ, 8 ապրիլի./Նովոստի-Արմենիա/. ԱՄՆ-ն և Ֆրանսիան չեղյալ են հայտարարել ղարաբաղյան հակամարտության կարգավորման ԵԱՀԿ Մինսկի խմբի համանախագահության ձևաչափը, հայտարարել է ՌԴ ԱԳ նախարար Սերգեյ Լավրովն այսօր Մոսկվայում։
«Այս խմբի շրջանակում ֆրանսիացի և ամերիկացի մեր այսպես կոչված գործընկերները ռուսատյաց կատաղության մեջ, փորձելով չեղարկել այն ամենը, ինչ վերաբերում է Ռուսաստանին, չեղյալ են հայտարարել նաև ԵԱՀԿ համանախագահների եռյակը՝ հայտարարելով, որ իրենք չեն շփվելու մեզ հետ այս ձևաչափում։ Դա նրանց իրավունքն է, եթե պատրաստ են զոհաբերել Ղարաբաղում և, ընդհանրապես, Անդրկովկասում կարգավորման հետաքրքրությունները, եթե պատրաստ են տվյալ դեպքում զոհաբերել հայկական կողմի շահերը»,- ասել է նա իր հայ գործընկեր Արարատ Միրզոյանի հետ համատեղ ասուլիսի ժամանակ:
Լավրովի խոսքով՝ արևմտյան երկրները բոլոր հակամարտությունները դարձնում են իրենց ռուսատյաց քաղաքականության պատանդները՝ ստիպելով բոլորին և ամեն ինչին դադարեցնել ցանկացած ձևաչափով փոխգործակցությունը միայն թե ապացուցեն իրենց միակողմանի կամքը բոլորին և ամենուր թելադրելու ունակությունը։
«Նման մոտեցումը համարում եմ բացարձակ անպատասխանատու, դա մեզ չի շեղի, մենք հետամուտ ենք ղարաբաղյան հակամարտության ամբողջական կարգավորմանն աջակցելուն: Այս ընտրությունը մերը չէ, և եթե ԱՄՆ-ն և Ֆրանսիան որոշեն նման կերպ վարվել, թող Աստված լինի նրանց դատավորը», - ասել է Լավրովը։
Միրզոյանն իր հերթին նշել է, որ աշխարհում ստեղծված աշխարհաքաղաքական իրավիճակը զգալիորեն բարդացրել է ԵԱՀԿ Մինսկի խմբի համանախագահության աշխատանքը։
«Բայց ինձ այլ նորություններ են հասնում. հաշվի առնելով շատ կոնկրետ ազդանշաններն ու հաղորդագրությունները, որոնք ես ստացել եմ բազմաթիվ այլ երկրների համանախագահներից՝ կցանկանայի հաստատել, որ չնայած մեր ադրբեջանցի գործընկերները կրկնում են, որ ԵԱՀԿ Մինսկի խմբի համանախագահությունը դադարել է գոյություն ունենալ, որ իրենք այլևս անելիք չունեն, քանի որ ղարաբաղյան հակամարտություն չկա, և քանի որ «Լեռնային Ղարաբաղ» կոչվող տարածաշրջանն այլևս չկա, չնայած այս ամենին, միջազգային հանրությունը շարունակում է տեսնել Լեռնային Ղարաբաղի հակամարտության կարգավորումը ԵԱՀԿ Մինսկի խմբի համանախագահության մանդատի շրջանակում, ինչը շատ հուսադրող է»,- ասել է Միրզոյանը։-0-
