ԵՐԵՎԱՆ, 7 փետրվարի./Նովոստի-Արմենիա/. Տնտեսագետ Հրանտ Միքայելյանը
«Նովոստի-Արմենիա» լրատվական գործակալության Telegram-յան ալիքով թողարկվող ամենշաբաթյա պոդկաստի ժամանակ խոսել է Հայաստանի համար Թուրքիայի տնտեսական էքսպանսիայի ռիսկերի մասին։
Ավելի վաղ ՀՀ էկոնոմիկայի նախարար Վահան Քերոբյանը հաստատել էր, որ Թուրքիայի քաղաքացիները Հայաստանում սկսել են անշարժ գույք և ընկերություններ ձեռք բերել։
«Չեռնոմիրդինը (ՌԴ նախկին վարչապետը, խմբգր.) լավ արտահայտություն ուներ, որն այս իրավիճակում հիշեցի. «Նման բան երբեք չի եղել, և ահա նորից»։ Անկեղծ ասած, ես դժվարանում եմ հիշել թուրքական ներդրումների, Հայաստանում Թուրքիայի քաղաքացիների կողմից բիզնեսի կամ անշարժ գույքի գնման փաստեր։ Եթե անգամ երբեք ֆորմալ արգելք չի եղել, միշտ էլ բավականին բարձր գին է եղել»,- ասաց Միքայելյանը։
Նրա խոսքով, եթե թուրք ներդրողն իսկապես ցանկանում է Հայաստանում ինչ-որ արտադրություն զարգացնել, ներդրումներ կատարել Հայաստանի տնտեսության մեջ, աշխատողներ վարձել և աշխատավարձ տալ, և եթե քաղաքական բաղադրիչ չկա և վստահություն կա, որ չի լինելու, ապա նման ներդրումներ կարելի է թույլ տալ։
«Բայց հաշվի առնելով, որ Թուրքիան հարևան շուկաները գրավելու լուրջ փորձ ունի՝ Լիբանան, Իրաք, Բուլղարիա, Վրաստան (առաջին հերթին՝ Աջարիա), այստեղ շատ լուրջ ռիսկեր կան։ Թուրքական կողմի հետ տնտեսական և քաղաքական շփումներին պետք է վերաբերվել չափազանց լուրջ, պատասխանատու, ուշադիր: Շատ կարևոր է, որ նույնիսկ ներդրողները միշտ ստուգվեն ԱԱԾ-ի կողմից, իսկ եթե ձեռնարկություն բացվի, և հարևան թուրքական վիլայեթներից մեկից 300 աշխատակիցներ գան, որոնք կլինեն ադրբեջանցիներ, ովքեր Նախիջևանից են, և ի դեպ, հայերին այդքան էլ շատ չեն սիրում։ Եվ այդ ընկերությունն, օրինակ, այստեղ կարող է վճարել ահաբեկչությունների համար»,- ասաց Միքայելյանը։
Նա դա միանգամայն իրատեսական է համարում: Ինչ վերաբերում է անշարժ գույքին, նա հիշեցրեց, որ Հայաստանում, հատկապես գյուղական համայնքներում, այն շատ էժան է։
«Իսկ եթե վաղը Էրդողանն (Թուրքիայի նախագահ Ռեջեփը, խմբ.) իր օլիգարխներին ուղարկի անշարժ գույք գնել Հայաստանում, հատկապես Արարատյան դաշտավայրո՞ւմ, նրանք ամբողջ հողը գնեն, հետո ի՞նչ ենք անելու»,- հարցրեց Միքայելյանը։-0-