ԵՐԵՎԱՆ, 30 մարտի./Նովոստի-Արմենիա/. Սոցցանցերում բուռն քննարկվում է պաշտպանության ոլորտում ուկրաինացի փորձագետ Օլենա Տրեգուբի մասնակցությամբ զվարճալի միջադեպը:
Նախօրեին Twitter-ի օգտատեր Տիգրան Գրիգորյանը (ով, ըստ անձնական էջի տվյալների, ԱԽ նախկին աշխատակից է) կատակով թվիթ է գրել իբր. «Հավաստի բազմաթիվ աղբյուրների համաձայն, Հայաստանը որոշել է իր ավիակիրներն ու ատոմային սուզանավերը Սևանից ուղարկել Սև ծով՝ Ուկրաինայում Ռուսաստանի ռազմական գործողություններին աջակցելու նպատակով»:
Այս թվիթն իր էջում հրապարակել է Ուկրաինայի պաշտպանության հարցերով Անկախ հակակոռուպցիոն հանձնաժողովի ղեկավար Օլենա Տրեգուբը՝ վրդովմունքով նշելով, որ անհրաժեշտ է «զսպել Հայաստանին ռազմական միջամտությունից Ուկրաինայում Ռուսաստանի ներխուժմանն օգնելու նպատակով»:
Հարկ է նշել, որ Հայաստանը Ռուսաստանի հետ չունի ընդհանուր սահման՝ ոչ միայն ծովային (Սևանը լիճ է), այլև ուղիղ ցամաքային (երկու երկրները կապող միակ ճանապարհն անցնում է Վրաստանի տարածքով): Հայաստանի և Ռուսաստանի միջև հաղորդակցությունը միայն օդային է:
Ավելի ուշ Գրիգորյանն իր Facebook-յան էջում պարզաբանել է, որ հումորային հրապարակմամբ հասել է իր նպատակին:
«Ողջ կովկասյան (ու ոչ միայն) թվիթերի ուշադրության կենտրոն եմ բերել վերջին շաբաթների ընթացքում Ադրբեջանի կողմից Հայաստանի դեմ իրականացվող անասուն հակաքարոզչության թեման ու դրա աբսուրդայնության մակարդակը: Թվիթը ու նմանատիպ հիմար արձագանքները այսօր ողջ օրը քննարկում էին միջազգային հեղինակավոր լրատվամիջոցների խմբագրեր, հայտնի փորձագետներ ու լրագրողներ: Ընթացքում բացահայտել ենք նաև այս կնոջ պես դեմքերի, որոնք, օրինակ, որպես ռազմական փորձագետ են ներկայանում, սակայն չգիտեն, թե աշխարհում մոտավորապես քանի երկիր միջուկային զենք ունի: Այս կինը ևս այսօր դարձել է ծաղրի առարկա: Ապագայում իր կողմից արտահայտված կարծիքները այլևս որևէ արժեք չեն ունենա», - նշել է Գրիգորյանը:
Ավելի վաղ ադրբեջանական ԶԼՄ-ները հրապարակել են ապատեղեկատվություն այն մասին, իբր Հայաստանը Ռուսաստանին է փոխանցել իր Սու-30 կործանիչները՝ Ուկրաինայի դեմ հատուկ գործողություններում օգտագործելու համար: ՀՀ ՊՆ-ն կտրականապես հերքել է այդ ապատեղեկատվությունը:-0-
