«Եթե ՀՀ իշխանությունները լինեին թուրքական գործակալներ, ապա կանեին նույնը՝ իրենց նպատակին հասնելու համար».Քոչարյանը` գործող իշխանությունների մասին (ՎԻԴԵՈ)

ԵՐԵՎԱՆ, 4 հոկտեմբերի./Նովոստի–Արմենիա/. ՀՀ երկրորդ նախագահ, «Հայաստան» դաշինքի ղեկավար Ռոբերտ Քոչարյանն ասուլիսի ժամանակ նշել է, որ Արցախյան 44–օրյա ծանր պարտությունը մի շարք հարցեր է առաջացրել, և «այս մեկ տարվա ընթացքում որևէ հարցի որևէ տրամաբանված պատասխան հանրությունը չի ստացել»։

«Ճիշտ հակառակը՝ այս ընթացքում նոր հարցեր են առաջացել, որոնց պատասխանները ևս չկան: Առաջին և ամենակարևոր հարցը՝ արդյո՞ք պատերազմն անխուսափելի է եղել, թե՞ պատերազմը հրահրվել է, միտումնավո՞ր, թե՞ քաղաքական միամտությամբ»,-նշեց նա:

Քոչարյանը հայտարարեց, որ յուրաքանչյուր պետություն, կառավարություն մինչև պատերազմ սկսելու որոշում կայացնելը պետք է անի և անում է բավական խորը վերլուծություն: 

«Առաջին հերթին համադրում են իրենց ԶՈւ-ի հնարավորությունը հակառակորդի ԶՈւ-ի հետ, փորձում են գնահատել այդ երկրի ներքաղաքական իրավիճակը, արդյո՞ք ունակ է այդ երկիրը կոնսոլիդացնել իր հասարակությանը, հարջորդիվ փորձում են հասկանալ հակառակորդ երկրի կառավարության ունակությունները, փորձում են հասկանալ՝ ինչպես կպահեն իրենց հակառակորդի դաշնակիցները և այն ռազմաքաղաքական միավորները, որոնց կազմում է գտնվում իրենց հակառակորդը»,-ասաց նա:

«2018-ից սկսած ՀՀ կառավարությունն արել է ամեն ինչ, որ բոլոր այդ հանգամանքները համընկնեն, և որ Ադրբեջանն իրավիճակը գնահատի որպես բարենպաստ պատերազմի ձևով Ղարաբաղի հարցը լուծելու համար», – հայտարարեց նա:

ՀՀ երկրորդ նախագահի խոսքով, հայկական իշխանությունները փակուղի են մտցրել բանակցային գործընթացը՝ իրարամերժ հայտարարություններով։

«3 տարում 3 տարբեր մոտեցում որդեգրելով, առաջացրել ենք Մինսկի խմբի անվստահությունը ՀՀ-ի նկատմամբ, ձևավորվել է կարծիք, որ խորամանկության տարբերակով փորձում ենք խուսափել առարկայական բանակցային գործընթացից, վարկաբեկել ենք բանակը տարբեր քրեական գործերով, բաժանել ենք հասարակությունը «սևերի» ու «սպիտակների» և ցույց ենք տվել, որ կառավարման տեսանկյունից քաոտիկ, ոչ սիստեմի բերող կառավարություն է գործում ՀՀ-ում, իսկ պատերազմի ժամանակ նման կառավարման ոճը ուղղակի մահացու է երկրի համար»,-ասաց նա:

«Փչացրել են (ՀՀ իշխանությունները) հարաբերությունները ՌԴ-ի և ՀԱՊԿ-ի հետ: Հասկանալի էր, որ ՀԱՊԿ-ը՝ որպես միավոր, որևէ ակտիվ մասնակցություն այս ամենի մեջ չի ունենալու: Ադրբեջանը շատ ուշադիր հետևում էր այս ամենին, և իրենք գնահատեցին, որ ավելի բարենպաստ պայմաններ ուղղակի չեն ունենալու, և ռիսկերը՝ կապված պատերազմի հետ արդյունքների հետ, իրենց համար նվազագույնն են: Հենց այդ սխալների պատճառով մենք հայտնվեցինք մեկուսացման մեջ», – ասաց նա։

«Եթե ՀՀ իշխանությունները լինեին թուրքական գործակալներ, ապա կանեին նույնը, նույն հերթականությամբ՝ իրենց նպատակին հասնելու համար», – նշեց Քոչարյանը։–0–