Բլինքենն ու Չավուշօղլուն քննարկել են Թուրքիայի կողմից Հայաստանի հետ երկխոսության դեսպանորդի նշանակման հարցը

ԵՐԵՎԱՆ, 4 հունվարի./Նովոստի-Արմենիա/. ԱՄՆ պետքարտուղար Էնթոնի Բլինքենը Թուրքիայի արտգործնախարար Մևլյութ Չավուշօղլուի հետ զրույցում անդրադարձել է Թուրքիայի կողմից Հայաստանի հետ հարաբերությունների կարգավորման գործընթացը քննարկելու համար հատուկ բանագնաց նշանակելու հարցը, հայտնում է ԱՄՆ Պետդեպարտամենտի կայքը։

Հաղորդագրությունում ասվում է, որ զրուցակիցները կարևորել են նաև Ուկրաինայում ռուսական էսկալացիայի սպառնալիքի հետ կապված համակարգման շարունակականությունը, որպես ՆԱՏՕ-ի դաշնակիցներ երկկողմ համագործակցության խորացման հնարավորությունը՝ փոխադարձ հետաքրքրություն ներկայացնող հարցերի լուծման համար։

2021 թ.-ի դեկտեմբերի 27-ին Չավուշօղլուն հայտարարեց, որ հարաբերությունների կարգավորման հարցով Թուրքիայի և Հայաստանի հատուկ ներկայացուցիչների առաջին հանդիպումը կարող է տեղի ունենալ Մոսկվայում, հավանական է հունվարին։

Ավելի վաղ հայտնի էր դարձել, որ հայ-թուրքական երկխոսության գործընթացի շուրջ բանակցություններում Թուրքիայի հատուկ ներկայացուցիչն է փորձառու դիվանագետ, ԱՄՆ-ում Թուրքիայի նախկին դեսպան Սերդար Քըլըչը։ Հայկական կողմից բանագնաց է նշանակվել Հայաստանի Հանրապետության Ազգային ժողովի փոխխոսնակ Ռուբեն Ռուբինյանը (Փաշինյանի մտերիմը)։

Հայաստանի և Թուրքիայի միջև հարաբերությունների բացակայության մասին

1991 թ.-ի դեկտեմբերի 24-ին Թուրքիան պաշտոնապես ճանաչեց Հայաստանի Հանրապետությունը, սակայն մինչ օրս հրաժարվում է դիվանագիտական հարաբերություններ հաստատել Հայաստանի հետ։

1993 թ.-ին Թուրքիան միակողմանի փակեց Հայաստանի հետ իր օդային և ցամաքային սահմանները։ Օդային սահմանը բացվել է 1995 թ.-ին միջազգային հանրության ճնշման ներքո։ Ցամաքային սահմանի բացման և դիվանագիտական հարաբերությունների հաստատման համար Թուրքիան առաջ է քաշում մի շարք անընդունելի պայմաններ, մասնավորապես՝ Հայոց ցեղասպանության միջազգային ճանաչումից հրաժարվելը։
1991 թ.-ից ի վեր երկկողմ հարաբերությունները կարգավորելու մի շարք փորձեր են արվել, որոնք Թուրքիայի դիրքորոշման պատճառով արդյունք չեն տվել։

Հարաբերությունների կարգավորման գործընթացը 2008 թ.-ի աշնանը նախաձեռնել է Հայաստանի այն ժամանակվա նախագահ Սերժ Սարգսյանը։ 2009 թ.-ի հոկտեմբերի 10-ին Հայաստանի և Թուրքիայի արտգործնախարարները Ցյուրիխում ստորագրեցին «Արձանագրություն դիվանագիտական հարաբերությունների հաստատման մասին» և «Երկկողմ հարաբերությունների զարգացման մասին արձանագրություն», որոնք պետք է վավերացվեին երկու երկրների խորհրդարանների կողմից։ Սակայն 2010 թ.-ի ապրիլի 22-ին Սարգսյանը իր հրամանագրով կասեցրեց հայ-թուրքական արձանագրությունների վավերացման գործընթացը՝ հայտարարելով, որ Թուրքիան պատրաստ չէ շարունակել սկսած գործընթացը։-0-