ԵՐԵՎԱՆ, 8 հունվարի./Նովոստի-Արմենիա/. Իրանը մտադիր է ԱՄՆ-ի կողմից իր տարածքում գտնվող օբյեկտների ուղղությամբ կրակ բացելու դեպքում հարված հասցնել ոչ միայն ամերիկյան ռազմաբազաներին, այլև Դուբային, Թել Ավիվին և Հայֆային, նշել է իրանագետ Ահարոն Վարդանյանը «Նովոստի-Արմենիա» գործակալության թղթակցի հետ զրույցում:
Փորձագետի մեկնաբանմամբ` իրադարձությունների հետագա զարգացումը կախված է ԱՄՆ-ի ձեռնարկած քայլերից:
Загружается новость ... "Лево"
Այն հարցին, թե հնարավոր է արդյոք ԱՄՆ-ի նախաձեռնությամբ այս դիմակայության մեջ ներգրավվեն ՆԱՏՕ-ի ուժերը, իրանագետը նշում է, որ հարցի լուծումը մնում է դաշինքի մասնակից-երկրների ձեռքում:
«Չնայած նշվում է, որ ՆԱՏՕ-ն ԱՄՆ-ն չէ, բայց Դաշինքում ներառված են այնպիսի երկրներ, ինչպիսիք են Գերմանիան, Ֆրանսիան և Թուրքիան, որոնք տիրապետում են մեծ ուժերի և խնդիրներ ունեն ԱՄՆ-ի հետ: Այս հարցը պետք է լուծվի ՆԱՏՕ-ի ներսում, և հիմա բարդ է կանխատեսում անելն ու այդ հարցին պատասխանելը»,- նշեց Վարդանյանը:
Հիշեցնենք, որ Ամանորից անմիջապես հետո ԱՄՆ–ն հրթիռակոծել է Բաղդադի օդանավակայանն ու սպանել Իսլամական հեղափոխության պահապանների կորպուսի ղեկավար, գեներալ Ղասեմ Սուլեյմանիին։
Իրանի անվտանգության բարձրագույն խորհրդի քարտուղար Ալի Շամհանին հայտարարել է, որ երկիրն ունի Վաշինգտոնից վրեժխնդիր լինելու 13 սցենար։ Ամերիկացիներին գրոհելու դեպքում Դոնալդ Թրամփը խոստացել է հասցնել «արագ և ուժեղ հարված» Իրանի 52 թիրախների նկատմամբ։
Երեքշաբթի լույս չորեքշաբթի գիշերը Իրանի հեղափոխության պահապանների կորպուսը հայտարարել է Սուլեյմանիի սպանության համար հատուցման օպերացիայի մեկնարկի մասին։ Թեհրանը հրթիռներ է արձակել Իրաքի արևմուտքում գտնվող Էյն–ալ–Ասադ և Էրբիլում գտնվող բազաների ուղղությամբ, որտեղ տեղակայված է ԱՄՆ բանակի զինվորական համակազմը։
Դրանից հետո Թրամփը հայտարարել է, որ «ամեն ինչ կարգին է»։ Fox News հեռուստաալիքը, հղում անելով սեփական աղբյուրներին, տեղեկացրել է, որ նախնական տվյալներով` ամերիկացիների շրջանում զոհեր չկան։–0-
