ԵՐԵՎԱՆ, 26 օգոստոսի./Նովոստի–Արմենիա/. Զեյթունում տեղի ունեցած պայթյունից տուժած 41-ամյա տղամարդը մարմնի ամբողջ մակերեսի այրվածք ունի. գտնվում է արհեստական շնչառության տակ։
Այս մասին, news.am-ի փոխանցմամբ, հայտնել է Առաջին համալսարանական հիվանդանոցի տնօրեն Արեն Բաբլումյանը։
«Ժամը 07։30-ից սկսած երկու հիվանդ է ընդունվել հիվանդանոց. 1949 թվականի ծնված կին է առաջինը։ Նրա առողջական վիճակը գնահատվում է միջին ծանրության, հետազոտվել է ամբողջ ծավալով։ Ունի անրակոսկրի և քթոսկրի կոտրվածքներ, մարմնի և դեմքի քերծվածքներ»,- ասել է նա։
Երկրորդ հիվանդի մասին ԲԿ տնօրենը նշել է, որ վիճակը շարունակում է մնալ ծայրահեղ ծանր։
«Երկրորդ հիվանդը, 1979 թվականի ծնված տղամարդը տեղափոխվել է մոտ 08։15-ի սահմաններում։ Ունի մարմնի ամբողջ մակերեսի այրվածք, գտնվում է ծայրահեղ ծանր վիճակում։ Նա գտնվում է արհեստական շնչառության տակ, վերակենդանացման բաժանմունքում է։ Զուգահեռ ունի մարմնի գոտկային հատվածի մաշկի տակ օտար մարմին, որը եղել է պայթյունի հետևանքով։ Հիվանդը պատրաստվում է վիրաբուժական միջամտության», – նշել է հիվանդանոցի տնօրենը։
Այսօր առավոտյան գազի արտահոսքից պայթյուն է տեղի ունեցել Երևանի Ռայնիսի փողոցի թիվ 1 քառահարկ պանելային շենքում։
Ըստ նախնական տվյալների փլատակների տակից դուրս է բերվել երկու քաղաքացի․ իրականացվել է 19 քաղաքացու տարհանում։
Երկու տուժած հոսպիտալացվել է «Հերացի» թիվ 1 հիվանդանոցային համալիր․ տուժած Սվետլանա Ս․-ն (ծնված 1949 թ․) այժմ գտնվում է հետազոտման փուլում, բժիշկները նրա առողջական վիճակը գնահատում են միջին ծանրության, իսկ մյուս տուժածինը (արական սեռի, մոտ 50 տարեկան)՝ ծայրահեղ ծանր:
Ինչպես ավելի ուշ հայտնել է ՀՀ վարչապետ Նիկոլ Փաշինյանը, փլատակների տակից դուրս է բերվել նաև երրորդ տուժածը։–0–
