Հրապարակվել են կադրեր Երևանում գրանցված ողբերգական ավտովթարի վայրից (ՎԻԴԵՈ)
16:37
27 Օգոստոսի 2021
ԵՐԵՎԱՆ, 27 օգոստոսի./Նովոստի–Արմենիա/. 2021թ. օգոստոսի 27-ին՝ ժամը 08:40-ի սահմաններում, Երևան քաղաքի Բաբաջանյան փողոցում «Օպել» մակնիշի ավտոմեքենայի վարորդը վրաերթի է ենթարկել Երևան քաղաքի բնակիչ, 59-ամյա տղամարդու, որից հետո նույն ավտոմեքենան ընդհարվել է մեկ այլ «Օպել» մակնիշի ավտոմեքենային և կանգ առել: Պատահարի հետևանքով ստացած մարմնական վնասվածքներից 59-ամյա տղամարդը տեղում մահացել է, հաղորդում է ՀՀ ՔԿ–ն:
Դեպքի առթիվ Երևան քաղաքի քննչական վարչության ճանապարհատրանսպորտային հանցագործությունների քննության բաժնում հարուցվել է քրեական գործ՝ ՀՀ քրեական օրենսգրքի 242-րդ հոդվածի 2-րդ մասով (Ճանապարհային երթևեկության անվտանգության ապահովմանն ուղղված պահանջները կամ ճանապարհային երթևեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ): Վրաերթի ենթարկված տղամարդը ճանաչվել է տուժող:
Նախաքննության ընթացքում կատարվել են դեպքի վայրի և տրանսպորտային միջոցի զննություններ, նշանակվել է դիակի դատաբժշկական փորձաքննություն: Պարզվել է, որ քաղաքացուն վրաերթի ենթարկած վարորդը գտնվել է սթափ վիճակում:
Նախաքննությունը շարունակվում է: Ձեռնարկվում են միջոցառումներ՝ պատահարի բոլոր հանգամանքները պարզելու, օբյեկտիվ և բազմակողմանի քննություն ապահովելու ուղղությամբ:
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:–0–