Ծուխ է նկատվել ու պայթյունի ձայն լսվել. հրապարակվել են կադրեր Վարդենիսում ինքնաշեն նռնակի պայթյունի վայրից (ՎԻԴԵՈ)

ԵՐԵՎԱՆ, 12 հունվարի./Նովոստի-Արմենիա/. Հունվարի 11-ին, ժամը 20.25-ի սահմաններում, ոստիկանության Վարդենիսի բաժնի հատուկ պահպանվող տարածքի դարպասների կողմից ծուխ է նկատվել, այնուհետև պայթյունի ձայն է լսվել, ինչի հետևանքով պատճառվել է գույքային վնաս, հաղորդում է ՀՀ ոստիկանությունը:

Մեկնած օպերատիվ-քննչական խումբը պարզել է, որ ժամը 20.20-ի սահմաններում անհայտ անձը հատուկ պահպանվող տարածքի մուտքի դարպասը պահող հենասյան վրա գցել է դեռևս չպարզված պայթուցիկ սարք, որի պայթյունից պատճառվել է գույքային վնաս:

Դեպքի վայրում հայտնաբերվել են հրահաղորդիչ քուղի մնացորդներ:

Քրեական ոստիկանության, Գեղարքունիքի մարզային վարչության և Վարդենիսի բաժնի ծառայողների համատեղ ձեռնարկած օպերատիվ-հետախուզական միջոցառումների արդյունքում պարզվել է, որ պայթյունը կատարել է Վարդենիս քաղաքի 58-ամյա բնակիչը: Նա հայտնաբերվել, հանցանք կատարած լինելու անմիջականորեն ծագած կասկածի հիմքով ձերբակալվել և ներկայացվել է Վարդենիսի քննչական բաժին:

Նախաձեռնվել է քրեական վարույթ:

Դեպքի հանգամանքները և վնասի չափը պարզվում են:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:-0-