Արտակարգ դեպք Երևանում. Nissan–ը լիցքավորվելուց հետո բռնկվել ու վերածվել է մոխրակույտի, վարորդը հոսպիտալացվել է

ԵՐԵՎԱՆ, 6 օգոստոսի./Նովոստի–Արմենիա/. Այսօր` օգոստոսի 6-ին, արտակարգ դեպք է տեղի ունեցել Երևանում։

Shamshyan.com–ի հաղորդմամբ, ժամը 10։50-ի սահմաններում Արտակարգ իրավիճակների նախարարության Փրկարար ծառայության 911 ճգնաժամային կառավարման կենտրոն ահազանգ է ստացվել, որ Նորագավիթի գազալցակայանի մոտակայքում ավտոմեքենա է այրվում։

Մինչ հրշեջների ժամանումը, վառվող ավտոմեքենայից մոտ 400 մետր հեռավորության վրա գործող հեղուկ գազի լիցքավորման կետի աշխատակիցները կրակմարիչներով փորձել են սեփական ուժերով մարել ավտոմեքենայում առաջացած հրդեհը։ Նրանք նաև օգնություն են ցուցաբերել վարորդին, որից հետո քաղաքացիական ավտոմեքենայով նրան տեղափոխել են հիվանդանոց։

Հրշեջները մարել են Nissan Tiida մակնիշի ավտոմեքենայում առաջացած հրդեհը, սակայն այն ամբողջովին վերածվել է մոխրակույտի։

Կայքի հաղորդմամբ, դեպքի վայրում հավավքածները նշել են, որ վարորդը ավտոմեքենան հեղուկ գազի լիցքավորման կայանում լիցքավորել է հեղուկ գազով, ապա դուրս է եկել, որից հետո, դեռևս անհայտ հանգամանքներում, ավտոմեքենայում կրակ բռնկվել ու վայրկյանական տարածվել ողջ ավտոմեքենայով։

Ոստիկանությունը պարզում է ավտոմեքենայի սեփականատիրոջ և հիվանդանոց տեղափոխված քաղաքացու ինքնությունը։–0–