Ողբերգական ավտովթար Գեղարքունիքում. բախվել են Mercedes–ն ու Mitsubishi–ն, կա 1 զոհ, 5 վիրավոր

ԵՐԵՎԱՆ, 2 օգոստոսի./Նովոստի–Արմենիա/. Երեկ՝ օգոստոսի 1-ին, ողբերգական ավտովթար է տեղի ունեցել Գեղարքունիքի մարզում։

Shamshyan.com–ի հաղորդմամբ, ժամը 22։20-ի սահմաններում Սևան-Մարտունի-Գետափ ավտոճանապարհի 57-րդ կմ հատվածում բախվել են Գեղարքունիքի մարզի բնակիչներ 22-ամյա Արտյոմ Պ․-ի վարած Mercedes մակնիշի և 20-ամյա Արտյոմ Մ.-ի վարած Mitsubishi մակնիշի ավտոմեքենաները։


Վթարի հետևանքով Mitsubishi-ի ուղևոր՝ Գեղարքունիքի մարզի բնակիչ 58-ամյա Ջեմմա Մախմուրյանը տեղում մահացել է։ Mitsubishi-ի վարորդ Արտյոմ Մ․-ն, նրա ուղևորներ՝ Գեղարքունիքի մարզի բնակիչներ 41-ամյա Թելլի Ս․-ն, 46-ամյա Արմենուհի Մ․-ն, Mercedes-ի վարորդ Արտյոմ Պ․-ն և նրա ուղևոր՝ Գեղարքունիքի մարզի բնակիչ 22-ամյա Արթուր Ս․-ն մարմնական վնասվածքներով տեղափոխվել են «Մարտունի» բժշկական կենտրոն։

Վթարի փաստով վարույթ է նախաձեռնվել։

Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։–0–