Խոշոր ու ողբերգական ավտովթար Կոտայքի մարզում. մահացածն ու վիրավորը ոստիկանության ծառայողներ են

ԵՐԵՎԱՆ, 23 դեկտեմբերի․ /Նովոստի-Արմենիա/․ Այսօր՝ դեկտեմբերի 23-ին, խոշոր ու ողբերգական ավտովթար է տեղի ունեցել Կոտայքի մարզում:

Ինչպես հայտնում է shamshyan.com-ը, ժամը 03:00-ի սահմաններում Երևաի բնակիչ, 23-ամյա Դանիել Մասչյանը իր վարած Nissan Tiida մակնիշի ավտոմեքենայով Երևան-Սևան ավտոճանապարհի 19-րդ կմ հատվածում՝ Չայնիի ոլորանների սկզբնամասում, դեպի Երևան ընթանալիս, դուրս է եկել ճանապարհի երթևեկելի գոտուց, բախվել հողաթմբերին ու քարերին և գլխիվայր շրջվելով՝ հայտնվել ձորում:

Վթարի հետևանքով վարորդ Դ. Մասչյանը մարմնական վնասվածքներով տեղափոխվել է Աբովյան բժշկական կենտրոն, որտեղից էլ Երևանի Սուրբ Գրիգոր Լուսավորիչ բժշկական կենտրոն, որտեղ գիտակցության չգալով՝ մահացել է, իսկ ուղևոր, Երևանի բնակիչ, 22-ամյա Դավիթ Ասլանյանը մարմնական վնասվածքներով տեղափոխվել է Սուրբ Գրիգոր Լուսավորիչ բժշկական կենտրոն, որտեղ բժիշկները նրա առողջական վիճակը գնահատում են ծանր:

Փաստի առթիվ ՀՀ քր օր-ի 242 հոդվածի 2-րդ մասի (Ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ) հատկանիշներով հարուցվել է քրեական գործ:

Ըստ աղբյուրի, մահացածը աշխատում էր ոստիկանության Երևան քաղաքի վարչության օպերատիվ կառավարման կենտրոնում՝ որպես կրտսեր տեսուչ, վիրավորը նույնպես նույն կենտրոնի կրտսեր տեսուչ է և վաղը մահացած Դ. Մասչյանի ծննդյան օրն էր լինելու: Դ. Մասչյանի հայրը աշխատում է ճանապարահային ոստիկանության 1-ին սպայական գումարտակում, իսկ վիրավորի հայրն էլ Երևանի ոստիկանության բաժիններից մեկում հետաքննչական բաժանմունքի պետ է:-0-