ԵՐԵՎԱՆ, 1 ապրիլի. /Նովոստի–Արմենիա/. Հայտնի են դարձել բլոգեր և քաղաքացիական ակտիվիստ Կարեն Վարդանյանի սպանության որոշ մանրամասներ, հայտնում է
shamshyan.com–ը։
Անհետ կորած քաղաքացիական ակտիվիստ Կարեն Վարդանյանը սպանված է. ոստիկանություն>>
Ոստիկանության Մալաթիայի բաժնի կողմից որպես անհայտ կորած որոնվում էր 1982 թ. ծնված Կարեն Վարդանյանը, ով մարտի 17-ին Արաբական Միացյալ Էմիրություններ մեկշաբաթյա գործուղում մեկնելու նպատակով դուրս էր եկել տնից և չէր վերադարձել:
Ինչպես հայտնում է կայքը, օպերատիվ–հետախուզական ծավալուն գործողությունների արդյունքում ապրիլի 1–ին ոստիկանություն բերման են ենթարկվել 23–ամյա Գևորգ Զոհրաբյանը և 28–ամյա Արթուր Միհրանյանը։
Նրանք կասկածվում են 34–ամյա Կարեն Վարդանյանի սպանության և նրա դին հողի տակ պահելու մեջ։
«Այսօր ավելի վաղ ոստիկանները և քննիչները Սիսակյան փողոցում գտնվող ավտոտնակներից մեկում հայտնաբերել են Կարեն Վարդանյանի դին, որը թաքցրել էին հողի տակ։ Դատաբժիշկը, զննելով մարմինը, հայտնեց, որ գլխի վրա կան բազմաթիվ հարվածների հետքեր, իսկ բերանը կտորով փակած էր։ Ավտոտնակը պատկանում է կասկածյալ Գ. Զոհրաբյանին»,– նշվում է հաղորդման մեջ։
Զոհրաբյանը ոստիկանության աշխատակիցներին հայտնել է, որ մարտի 17–ին նա իր մեքենայով Արթուրի և Կարենի հետ մեկնել է Վրաստան, սակայն Գեղարքունիքի մարզի Սևան քաղաքի մոտակայքում սպանել է Կարենին, Արթուրի հետ վերադարձել Սիսակյան փողոց և թաքցրել Կարենի դին ավտոտնակում։
Տվյալ հանցագործությունը բացահայտելու համար ձևավորվել է մի քանի օպերատիվ խումբ, որոնց ներկայացուցիչները ներկա էին ավտոտնակում մարմինը հայտնաբերելու ընթացակարգին։ Զոհրաբյանը և Միհրանյանը ձերբակալվել են։
Տվյալ փաստով Երևանի ՔԿ քննչական վարչությունում քրեական գործ է հարուցվել Հայաստանի ՔՕ 104–րդ հոդվածի 2–րդ մասի 7–րդ կետով (Սպանություն, որը կատարվել է մի խումբ անձանց կամ կազմակերպված խմբի կողմից)։ -0-
