«Նարնջագույն սցենարը» Ռուսաստանում որևէ հեռանկար չունի. Նարիշկին

ԵՐԵՎԱՆ, 30 հունվարի. /Նովոստի-Արմենիա/. ՌԴ պետդումայի խոսնակ Սերգեյ Նարիշկինը համաձայն է ՌԴ ֆինանսների նախկին նախարար Ալեքսեյ Կուդրինի հետ, ով Ռուսաստանում ուկրաինական սցենարով «նարնջագույն հեղափոխությունն» անհնար է համարում:

Կուդրինը հունվարի 27-ին Դավոսում կայացած Համաշխարհային տնտեսական ֆորումի ժամանակ հայտարարել է, որ չի ցանկանում և Ռուսաստանում անհնար է համարում ուկրաինական «նարնջագույն» սցենարը, իսկ ՌԴ նախագահի նախաձեռնած ընտրական օրենսդրության փոփոխություններից հետո ընտրություններն ավելի թափանցիկ կդառնան: Նարիշկինը մեկնաբանել է, որ չի կարող «իրեն պարզապես կողմնակի դիտորդ համարել», քանի որ Կուդրինը իր ընկերն ու գործընկերն է: Սակայն Կուդրինի կարծիքի նկատմամբ հետաքրքրությունը հասկանալի է՝ անկախ անձնական հարաբերություններից, կարծում է Նարիշկինը:

«Համոզված եմ, որ «նարնջագույն սցենարը» Ռուսաստանում որևէ հեռանկար չունի: Ռուսաստանում հասարակական տրամադրությունն այլ է՝ այդ թվում նաև 1991 թ.-ի Խորհրդային Միության հետ համեմատ», - ավելացրել է նա, հաղորդում է «ՌԻԱ Նովոստին»:

Խոսնակի կարծիքով՝ 1991 թ.-ից հետո ռուսական հասարակությունը դարձել է ավելի ազատ և միաժամանակ ավելի պատասխանատու:

«Մարդիկ հասկանում եմ, որ քաղաքական համակարգի փոփոխությունները կարող են և պետք է ընթանան օրենքի շրջանակներում, օրինական ընթացակարգերի շրջանակներում: Մարդիկ, ովքեր քաղաքականությունում փոփոխություն են ցանկանում, չեն ցանկանում, որպեսզի այդ փոփոխությունները սպառնան պետության գոյությանը», - համոզված է քաղաքական գործիչը: Նա նշել է, որ քաղաքացիների մեծամասնությունը շատ բացասական է վերաբերվում երկիրը թուլացնելու ցանկացած փորձին:-0-