Մարտին անցկացվող նախագահական ընտրություններին իր թեկնածությունն առաջադրած Վլադիմիր Պուտինն առաջարկում է կազմել 100 գրքերի հատուկ ցանկ, որը պետք է կարդա յուրաքանչյուր ռուս աշակերտ, հաղորդում է ՌԻԱ Նովոստին:
Երկուշաբթի «Նեզավիսիմայա գազետան» հրապարակել է Պուտինի հոդվածը՝ ուղղված ազգային հարցին: Մեկ շաբաթ առաջ՝ հունվարի 16-ին, «Իզվեստիա» թերթում, ինչպես նաև Պուտինի կայքում հրապարակվել էր նրա հոդվածը՝ «Ռուսաստանը կենտրոնանում է. մարտահրավերներ, որոնց պետք է դիմակայենք» վերնագրով: Ինչպես տեղեկացրել էր վարչապետի մամուլի քարտուղարը, «Իզվեստիայի» հոդվածը նախագահական ծրագրի ներածական մասն է կազմում: Ենթադրվում է, որ ռուսական մամուլում կշարունակվեն Պուտինի ծրագրային հոդվածների հրապարակումը:
Ինչպես նշում է Պուտինը, որոշ «ամերիկյան համալսարաններում 20-րդ դարի 20-ական թվականներին արևմտյան մշակութային կանոնն ուսումնասիրելու շարժում սկսվեց: «Իրեն հարգող յուրաքանչյուր ուսանող պետք է կարդար 100 գիրք, որն ընդգրկված էր հատուկ կազմած ցուցակում: ԱՄՆ-ի որոշ համալսարաններում այդ ավանդույթը պահպանվել է մինչև այսօր»,- հստակեցրել է նա:
«Մենք միշտ կարդացած ազգ ենք եղել: Եկեք հարցնենք մեր մշակութային հեղինակավոր անձանց և կազմենք 100 գրքերի ցանկ, որը պետք է կարդացած լինի ռուսական դպրոցի յուրաքանչյուր շրջանավարտ: Ոչ թե անգիր անի դպրոցում, այլ հենց իր համար կարդա: Եվ եկեք ավարտական քննության համար շարադրություն հանձնարարենք կարդացածի թեմայով: Կամ էլ ծայրահեղ դեպքում երիտասարդներին հնարավորություն տանք իրենց գիտելիքն ու աշխարհայացքը դրսևորել օլիմպիադաներում ու մրցույթներում»,- գրում է Պուտինը:--0-
