Բորդյուժան համոզված է, որ ՀԱՊԿ-ում Ղազախստանի նախագահությունը «էֆեկտիվ արդյունքներ» կտա

ԵՐԵՎԱՆ, 12 դեկտեմբերի. /Նովոստի-Արմենիա/. Հավաքական անվտանգության պայմանագրի կազմակերպության նախագահությունը 2012թ.-ին կանցնի Ղազախստանին, հայտնել է ՀԱՊԿ գլխավոր քարտուղար Նիկոլայ Բորդյուժան, Հաղորդում է «ՌԻԱ Նովոստին»:

Նուրսուլթան Նազարբաևը երկուշաբթի Աստանայում հանդիպել է ՀԱՊԿ գլխավոր քարտուղարի հետ, հաղորդում է Ղազախստանի նախագահի մամուլի ծառայությունը: Բորդյուժան Նազարբաևին տեղեկացրել է այս տարվա դեկտեմբերին Մոսկվայում կայանալիք ՀԱՊԿ հավաքական անվտանգության խորհրդի նստաշրջանի նախապատրաստական աշխատանքների մասին:

«Օգոստոսին Աստանայում տեղի է ունեցել ՀԱՊԿ անդամ-պետությունների ղեկավարների ոչ պաշտոնական գագաթնաժողովը: Բարձր մակարդակով կազմակերպված հանդիպումը շատ արդյունավետ էր: Նախագահները պայմանավորվածություն ձեռք բերեցին կազմակերպության զարգացման լուրջ և խորը հարցերի շուրջ: Երկուշաբթի ես տեղեկացրեցի Ղազախստանի նախագահին Աստանայում պետությունների ղեկավարների կողմից ձեռք բերված պայմանավորվածությունների կատարման ընթացքի մասին: Մոսկվայում կայանալիք նստաշրջանի ժամանակ կքննարկվեն մի շարք հարցեր և փաստաթղթեր, որոնք լուրջ ազդակ են հաղորդում ՀԱՊԿ-ի զարգացմանը: Կազմակերպության նախագահությունն անցնում է Ղազախստանի Հանրապետությանը», - ասել է նա:

«Ավանդաբար Ղազախստանի նախագահությունը շատ ստեղծարար և հաջող է լինում, այդ պատճառով մենք համոզված ենք, որ հաջորդ տարին կնշանավորվի ՀԱՊԿ-ի ինտենսիվ գործունեությամբ և էֆեկտիվ արդյունքներով», - ընդգծել է Բորդյուժան:

Այս տարի ՀԱՊԿ-ում նախագահում էր Բելառուսը:

ՀԱՊԿ-ի անդամներն են Հայաստանը, Բելառուսը, Ղազախստանը, Ղրղզստանը, Ռուսաստանը, Տաջիկստանն ու Ուզբեկստանը:-0-