Իրադարձությունների զարգացումն Անդրկովկասում հաստատում է ռուս-հայկական համագործակցության ամրապնդման անհրաժեշտությունը. Միրոնով
ԵՐԵՎԱՆ, 17 սեպտեմբերի. /Նովոստի-Արմենիա/. Իրադարձությունների զարգացումն Անդրկովկասում հաստատում է ռուս-հայկական համագործակցության ամրապնդման անհրաժեշտությունը, ասվում է Հայաստանի անկախության հռչակման 20-ամյակի կապակցությամբ «Արդար Ռուսաստան» կուսակցության առաջնորդ Սերգեյ Միրոնովի շնորհավորական ուղերձում:
Ինչպես հայտնում է Ռուսաստանի հայերի «Երկրամաս» թերթի տեղեկատվական կենտրոնը, շնորհավորանքն ընթերցվել է կուսակցության ներկայացուցիչ Ռոման Բեռնացկու կողմից Մոսկվայում տեղի ունեցած տոնական միջոցառման ընթացքում:
«Ներկայումս Ռուսաստանի և Հայաստանի միջև համագործակցությունը ռազմավարական բնույթ է կրում և հիմնված է երկու պետությունների երկարաժամկետ շահերի վրա: Այն ամրագրված է բազմաթիվ համաձայնագրերով և պայմանագրերով, որոնք ապահովում են երկկողմ հարաբերությունների կայուն զարգացումը, ինչպես նաև երկու երկրների փոխգործակցությունը միջազգային ասպարեզում»,- ասվում է ուղերձում:
Ըստ նրա՝ հաջողված կարելի է համարել ԱՊՀ պետությունների միջխորհրդարանական վեհաժողովի և ՀԱՊԿ շրջանակներում փոխգործակցությունը:
«Իրադարձությունների զարգացումն Անդրկովկասում հաստատում է ռուս-հայկական համագործակցության ամրապնդման անհրաժեշտությունը: Դա վերաբերում է նաև հայ-թուրքական հարաբերությունների և Լեռնային Ղարաբաղի հակամարտության կարգավորման գործընթացի բնագավառին»,- նշել է Միրոնովը:
Նա կարևորել է սփյուռքի դերը Ռուսաստանի և Հայաստանի միջև գործընկերության հետագա խորացման և մի շարք հեռանկարային նախագծերի իրագործման օժանդակության ցուցաբերման գործում:
Հայաստանի Հանրապետության անկախության 20-ամյակին նվիրված տոնական միջոցառումն անցկացվել է սեպտեմբերի 15-ին` Մոսկվայում Գրականագետների Կենտրոնական տան մեծ դահլիճում:
Երեկոն կազմակերպվել է «Ռուս-հայկական համագործակցություն» մոսկովյան տարածաշրջանային կազմակերպության կողմից Հայաստանի դեսպանության համագործակցությամբ և «Արցախի բարեկամներ» ակումբի, «Ջավախքի որդիներ» կազմակերպության, Պոդոլսկ քաղաքի «Նաիրի» միության, Դոլգոպրուդնի քաղաքի հայկական համայնքի աջակցությամբ: -0-
