Ռուսաստանի հավաքականում պակասում է ինքնանվիրումը ընկերական հանդիպումների ժամանակ. Ադվոկատ

Ռուսաստանի հավաքականի ֆուտբոլիստները ընկերական հանդիպումների ժամանակ դաշտում չեն ցուցադրում իրենց ողջ ներուժը, կարծում է Ռուսաստանի հավաքականի գլխավոր մարզիչ Դիկ Ադվոկատը, որի խոսքերը մեջբերում է «Սովետսկի Սպորտ» հրատարակությունը:

Երեքշաբթի Դոխայում ռուսները ոչ-ոքի են խաղացել Քաթարի համեստ թիմի հետ (1:1): Նախորդ երկու ընկերական հանդիպումների ժամանակ ռուսները զիջել են Բելգիայի և Իրանի հավաքականներին համապատասխանաբար 0:2 և 0:1 հաշվով:

«Առաջին 15 րոպեն շատ դանդաղ էինք խաղում: Որոշ ֆուտբոլիստների մոտ պակասում էր կտրուկությունն ու ագրեսիան: Ես հերթական անգամ հասկացա, որ ընկերական հանդիպումների ժամանակ շատ բարդ է ինքնանվիրման հասնել: Այն ինքնավիրման, որը պահանջվում է նման մակարդակի խաղի համար: Միաժամանակ մենք յոթ-ութ շատ լավ պահեր ունեինք», - հայտարարել է Ադվոկատը ֆուտբոլային հանդիպումից հետո կազմակերպված մամուլի ասուլիսի ժամանակ:

Ռուսաստանի ֆուտբոլի հավաքականի մարզիչը նշել է, որ շատ օգտակար և անհրաժեշտ է նմանատիպ հանդիպումների անցկացումը:

«Ինձ համար դա շատ օգտակար խաղ էր: Կարևոր էր տեսնել, թե ինչպես են փոխգործակցում ֆուտբոլիստները նոր համադրություններում, փոքր-ինչ այլ մարտավարական սխեմայում, որը մենք օգտագործեցինք երկրորդ խաղակեսում», - պարզաբանել է հոլանդացին:

Հունիսի 4-ին Սանկտ Պետերբուրգում կայանալիք հաջորդ պաշտոնական խաղի ժամանակ Ռուսաստանի հավաքականն ուժերը կչափի Հայաստանի ընտրանու հետ:-0-