ԵՐԵՎԱՆ, 7 փետրվարի. /Նովոստի-Արմենիա/. Ռուսաստանի ֆուտբոլի հավաքականի գլխավոր մարզիչ Դիկ Ադվոկատը պատրաստ է Լոնդոնի «Արսենալի» ֆուտբոլիստ Անդրեյ Արշավինին թույլատրել խաղալ ողջ 90 րոպեն Իրանի թիմի դեմ ընկերական հանդիպման ժամանակ, հաղորդում է «ՌԻԱ Նովոստին»:
Ընկերական հանդիպումը տեղի կունենա չորեքշաբթի՝ փետրվարի 9-ին Աբու Դաբիում: Արշավինը վերջերս հազվադեպ է ընդգրկվում «Արսենալի» հիմնական կազմի մեջ, նա այժմ ավելի հաճախ փոփոխության է դուրս գալիս: Նախորդ հանգստյան օրերին «Նյուքասլի» հետ հանդիպման ժամանակ Արշավինը Անգլիայի առաջնության շրջանակներում առաջին անգամ հայտարարագրվել էր հիմնական կազմում:
«Կարծում եմ, որ «Արսենալի» մարզիչ Արսեն Վենգերի համար շատ կարևոր է, որպեսզի Արշավինը խաղա 90 րոպե: Լավ կլինի, եթե նա խաղա ողջ հանդիպման ընթացքում, նա չի բողոքի: Սակայն նախօրոք չեմ կարող ասել, թե ով է խաղալու 45 և ով՝ 90 րոպե», - երկուշաբթի Մոսկվայում կայացած մամուլի ասուլիսի ժամանակ ասել է Ադվոկատը:
Նա նաև հայտարարել է, որ հարցականի տակ է ԲԿՄԱ-ի կիսապաշտպան Ալան Ձագոևի մասնակցության հարցը, ով վնասվածք է ստացել:
«Այժմ նա բուժզննում է անցնում, և առաջիկայում կորոշվի նրա մասնակցության հարցը: Եթե նա չմասնակցի խաղին, ապա նրան ոչ ոք չի փոխարինի», - ընդգծել է հոլանդացի մասնագետը:
Հերթական անգամ պատասխանելով երկրի ֆուտբոլային հավաքականում նոր ֆուտբոլիստներ ընդգրկելու մասին լրագրողների հարցին՝ Ադվոկատը նշել է. «Իմ աշխատանքի ամենասկզբից ես մշտապես պատասխանում եմ այս հարցին, սակայն մեր հիմնական նպատակը Եվրո-2012-ին հասնելն է: Մենք փորձարկումներ անելու ժամանակ չունենք: Եթե դուք աշխատում ենք ակումբում, ապա կարող եք ձեզ թույլ տալ փորձարկումներ, սակայն մենք տարվա մեջ ընդամենը 2-3 ընկերական հանդիպում ենք ունենում»:-0-
