Արկադի Եղիազարյանն ընտրվել է Մոսկվայի նավթավերամշակման գործարանի գլխավոր տնօրենի պաշտոնում

«Մոսկվայի նավթավերամշակման գործարան» (ՄՆՎԳ) ԲԲԸ-ի բաժնետերերը երկուշաբթի արտահերթ ժողովի ժամանակ որոշում են ընդունել ձեռնարկության գլխավոր տնօրեն Իլդուս Սարվարովի լիազորությունները ժամկետից շուտ ավարտելու և Արկադի Եղիազարյանին գլխավոր տնօրենի պաշտոնում նշանակելու մասին, նշվում է երեքշաբթի հրապարակված ՄՆՎԳ-ի տեղեկատվության մեջ, հաղորդում է «ՌԻԱ Նովոստին»:

ՄՆՎԳ-ի տնօրենների խորհուրդը հոկտեմբերի 8-ին կայացած նիստի ժամանակ ընդունել է նախկին գլխավոր տնօրեն Սարվարովի ժամկետից շուտ հրաժարականը սեփական նախաձեռնությամբ, տեղեկացնում է «Գազպրոմ նեֆտին», որին է պատկանում է գործարանի 50 տոկոսը: Սարվարովը մեկ տարի էլ չի զբաղեցրել ՄՆՎԳ-ի գլխավոր տնօրենի պաշտոնը, նա պաշտոնավարել է 2009 թ.-ի նոյեմբերից:

Այդ ժամանակ էլ ՄՆՎԳ-ի գլխավոր տնօրենի ժամանակավոր պաշտոնակատար էր նշանակվել Եղիազարյանը, ով «Գազպրոմ նեֆտիի» գլխավոր տնօրենի տեղակալի լոգիստիկայի, վերամշակման և իրացման գծով խորհրդական էր: Ավելի վաղ Եղիազարյանը զբաղեցրել է NIS Petrol-ի գործադիր տնօրենի պաշտոնը՝ գլխավորելով սերբական NIS-ի լոգիստիկայի, նավթավերամշակման և իրացման վարչությունը:

Վերամշակման ծավալով ռուսական ՆՎԳ-ների թվում յոթերորդ տեղը զբաղեցնող Մոսկվայի ՆՎԳ-ն 2009 թ.-ին 2,1 տոկոսով ավելացրել էր նավթավերամշակումը՝ հասցնելով 10,006 միլիոն տոննայի: Գործարանի հզորությունը թույլ է տալիս օրական վերամշակել ավելի քան 25 հազար տոննա նավթ:-0-