Մոսկվայի քաղաքապետը դեռ որոշում չի կայացրել իր ապագայի վերաբերյալ

Մոսկվայի քաղաքապետ Յուրի Լուժկովը դեռևս չի կողմնորոշվել Մոսկվային քաղաքապետի պաշտոնում իր ապագայի կապակցությամբ:

Լուժկովն արդեն 18 տարի է ղեկավարում է Մոսկվան, նա զբաղեցնում է քաղաքապետի պաշտոնը 1992 թ.-ից: Քաղաքապետի լիազորությունների ժամկետը լրանում է 2011 թ.-ի ամռանը: Երկուշաբթի՝ հուլիսի 19-ին տեղի ունեցած մամուլի ասուլիսի ժամանակ Լուժկովը հրաժարվել է մեկնաբանել 2011 թ.-ից հետո իր լիազորությունների ժամկետի հնարավոր երկարացման մասին լրագրողների հարցը:

«Դա իմ գործն է: Ես սկզբից պետք է ինձ համար որոշում ընդունեմ», - հայտարարել է Լուժկովը «Մոսկովսկի կոմսոմոլեց» թերթին, հաղորդում է «ՌԻԱ Նովոստին»:

Լուժկովի հրաժարականի մասին ասեկոսեներն անընդհատ շրջանառության մեջ են: Իսկ նա իր հնարավոր հրաժարականի մասին ասեկոսեներին հումորով է վերաբերվում: 2008 թ.-ի փետրվարին Լուժկովը հայտարարեց լրագրողներին, որ աշխատում է քաղաքային համակարգում 1986 թ.-ից, և ամեն տարի նրան ճանապարհում են:

Լուժկովը ծնվել է 1936 թ. սեպտեմբերի 21-ին Մոսկվայում, ավարտել է Մոսկվայի Գուբկինի անվան Նավթի և գազի ինստիտուտը, ղեկավարող պաշտոններ է զբաղեցրել քիմիական արդյունաբերության ձեռնարկություններում և կազմակերպություններում:-0-