ԵՐԵՎԱՆ, 4 մայիսի. /Նովոստի-Արմենիա/. Ռուսաստանցի հեռուստադիտողը մայիսյան օրերին կարող է դիտել լեգենդար հետախույզներ Գևորգ և Գոհար Վարդանյանների մասին պատմող գեղարվեստական-վավերագրական ֆիլմը, որում ներկայացվում է Խորհրդային արտաքին հետախուզության դերը Թեհրանում 1943 թ.-ին հակահիտլերյան կոալիցիայի առաջնորդների հանդիպման ժամանակ առաջնորդներին սպանելու՝ ֆաշիստական Գերմանիայի ծրագրերը ձախողելու գործում, «ՌԻԱ Նովոստիին» տեղեկացրել է Արտաքին հետախուզության ծառայության (ԱՀԾ) մամուլի բյուրոյի ղեկավար Սերգեյ Իվանովը:
«Ֆիլմը, որի աշխատանքներն ավարտում է «Արտել» ստուդիան՝ Ռուսաստանի Առաջին ալիքի պատվերով, նվիրված է Մեծ հաղթանակի 65-ամյակին և ռուսական հետախուզության 90-ամյա հոբելյանին նվիրված մասշտաբային նախագծի մի մասն է: Ֆիլմը ստեղծվել է ՌԴ ԱՀԾ-ի մամուլի բյուրոյի ակտիվ աջակցությամբ», - ասել է Իվանովը:
Նրա խոսքերով՝ «Ճշմարիտ պատմություն. Թեհրան 43» ֆիլմի գլխավոր հերոսները ամուսիններ, ոչ լեգալ հետախույզներ Գևորգ և Գոհար Վարդանյաններն են: Ֆիլմում 1943 թ.-ի թեհրանյան դեպքերի մասին պատմում են հետախույզ ամուսինները: «Ընտանեկան զույգն առաջին անգամ կպատմի մասնագիտական և անձնական կյանքի բազմաթիվ դրվագների մասին», - նշել է Իվանովը:
Նա նաև տեղեկացրել է, որ ֆիլմի նկարահանումներն անցկացվել են Ռուսաստանում, Սիրիայում և Չեխիայում: Երեքշաբթի՝ մայիսի 5-ին , «Ռոսիյսկայա գազետայի» խմբագրությունում ֆիլմը կցուցադրվի մամուլի ներկայացուցիչների համար, ցուցադրությանը ներկա կլինեն Վարդանյան ամուսինները, ֆիլմի ստեղծողներն ու գլխավոր դերակատարները:-0-
