ՌԴ պետդուման առաջարկում է հուլիսի 28-ին նշել Ռուսիայի մկրտության օրը

ԵՐԵՎԱՆ, 21 ապրիլի. /Նովոստի-Արմենիա/. ՌԴ պետդուման չորեքշաբթի առաջին ընթերցմամբ կքննարկի կառավարության օրինագիծը, որն առաջարկում է նոր հիշարժան տարեթիվ սահմանել՝ Ռուսիայի մկրտության օրը և տոնել այն հուլիսի 28-ին, երբ Ռուս ուղղափառ եկեղեցին հարգում է իշխան Վլադիմիրի հիշատակը:

Առաջարկվում է ուղղումներ մտցնել «Ռուսաստանի մարտական փառքի և հիշարժան օրերի մասին» օրենքում: Օրինագիծը մշակել է ՌԴ մշակույթի նախարարությունը, հաղորդում է «ՌԻԱ Նովոստին»:

Տոնն առաջարկվում է նշել՝ ի պատիվ Ռուսիայի մկրտության, որը տեղի է ունեցել 988 թվականին՝ Կիևի իշխան Վլադիմիրի նախաձեռնությամբ:

Հիշարժան տարեթվին նվիրված միջոցառումը կֆինանսավորվի դաշնային բյուջեի միջոցներով: Ծախսերի չափը կսահմանվի 2011 թ.-ի և հետագա տարիների բյուջեն ծրագրավորելիս:

Ռուսիայի մկրտման օրվան պետական կարգավիճակ տալու առաջարկով հանդես է եկել Ռուս ուղղափառ եկեղեցին: Ուկրաինայում նման տարեթիվն արդեն մի քանի տարի նշվում է որպես պետական տոն:-0-