«Օդեսայի հայկական համայնքը» Օդեսայում անցկացված կիրակնօրյա դպրոցների փառատոնի հաղթող է ճանաչվել

«Օդեսայի հայկական համայնք» հասարակական կազմակերպությունը առաջին տեղն է զբաղեցրել Օդեսայի ազգային-մշակութային միությունների կիրակնօրյա դպրոցների «Ջերելո մայստերնոստի» փառատոնում, որն ավարտվել է նախօրեին, հաղորդում է Analitika.at.ua կայքը: Հայկական կիրակնօրյա դպրոցը երկրորդ տարին անընդմեջ հաղթում է մրցույթում:

Երկրորդ տեղը զբաղեցրել է Օդեսայի վրացական ազգային-մշակութային «Սաքարթվելո» միության կիրակնօրյա դպրոցը: Երրորդ տեղը կիսել են «Օդեսայի հույներ», «Օդեսայի բուլղարական բարեկամություն», «Հեսեդ Շաարեյ Ցիոն» ստեղծագործական համույթներն ու Օդեսայի քաղաքային չեխական «Չեշսկայա ռոդնա» միությունը:

Նրանք բոլորը պարգևատրվել են Օդեսայի քաղաքական խորհրդի պատվոգրերով և արժեքավոր նվերներով: Հանդիսավոր մասի ավարտից հետո հանդիսատեսի առջև ելույթ ունեցան քաղաքի կիրակնօրյա դպրոցների ստեղծագործական համույթները:

Փառատոնն ավանդաբար անցկացվում է Օդեսայի քաղաքային խորհրդի ներքին քաղաքականության վարչության կողմից:-0-