ԱՊՀ մասնակից-պետությունների Հումանիտար համագործակցության խորհուրդն (ՀՀԽ) ու ԱՊՀ մասնակից-պետությունների Հումանիտար համագործակցության միջպետական հիմնադրամը (ՀՀՄՀ) հայտարարում են 2009թ.-ին «Համագործակցության աստղեր» միջպետական մրցանակի թեկնածուների առաջադրման մեկնարկի մասին:
Ինչպես հաղորդում է Հումանիտար համագործակցության միջպետական հիմնադրամը, «Համագործակցության աստղեր» միջպետական մրցանակները հաստատվել են ՀՀԽ-ի և ՀՀՄՀ-ի կողմից գիտության և կրթության, մշակույթի և արվեստի, հումանիտար գործունեության ոլորտներում:
«Համագործակցության աստղեր» միջպետական մրցանակները բաղկացած են դրամական պարգևատրումից, դիպլոմից, մրցանակի դափնեկրի պատվավոր կոչումից և դրա հավաստագրից: Նշված երեք անվանակարգում շնորհվում է երեք մրցանակ՝ յուրաքանչյուրը 2 միլիոն ռուբլի արժողությամբ:
«Համագործակցության աստղեր» միջպետական մրցանակին կարող է հավակնել անձը կամ կոլեկտիվը, որի՝ գիտության, կրթության, մշակույթի, արվեստի կամ հումանիտար գործունեության զարգացման մեջ կատարած ներդրումը պետք է համապատասխանի համաշխարհային ձեռքբերումների մակարդակին և պետք է նպաստի ինչպես ԱՊՀ յուրաքանչյուր երկրի, այնպես էլ Համագործացության զարգացմանը:
Մրցանակի թեկնածուների առաջադրումն իրականացնում են ԱՊՀ պետությունների կառավարությունները, որոնք ՀՀԽ-ի և ՀՀՄՀ-ի մասնակիցներ են, կամ նրանց կողմից լիազորված մարմինները՝ ՀՀԽ-ի և ՀՀՄՀ-ի մասնակից-պետություններում սահմանված ընթացակարգերի համաձայն՝ պետական մրցանակին առաջադրվող աշխատանքների փորձաքննության համար:
Յուրաքանչյուր երկիր «Համագործակցության աստղեր» միջպետական մրցանակին կարող է առաջադրել երեք թեկնածու՝ մեկական թեկնածու ամեն անվանակարգում: Եթե կոլեկտիվ է առաջադրվում, ապա պետք է ներկայացվեն միայն հիմնական հեղինակները, որոնց ստեղծագործական ներդրումն առավել զգալի է և նրանց թիվը չպետք է գերազանցի երեքը: Չի թույլատրվում առաջադրվող կոլեկտիվում ընդգրկել միայն վարչական և կազմակերպչական աշխատանքներ իրականացնող անձանց:
Մրցանակների դափնեկիրների անունները կհրապարակվեն ԶԼՄ-ներում 2009թ.-ի դեկտեմբերին: Դափնեկիրների հրապարակման և պարգևատրման արարողությունը ծրագրվում է անցկացնել մինչև 2010թ.-ի ապրիլը:
«Համագործակցության աստղեր» միջպետական մրցանակին թեկնածուներ առաջադրող կառավարությունները կամ նրանց կողմից լիազորված մարմինները պետք է մինչև 2009թ.-ի սեպտեմբերի 30-ը ՀՀԽ-ի և ՀՀՄՀ-ի Մրցանակների խորհրդի քարտուղարություն (որի գործառույթներն իրականացնում է ՀՀՄՀ-ի Գործադիր տնօրինությունը) ներկայացնեն յուրաքանչյուր թեկնածուի մասին գրավոր նկարագիր: Նկարագրի հետ պետք է ներկայացվեն նաև այն նյութերը (այդ թվում՝ հրապարակված գիտական, ստեղծագործական, գեղարվեստական, մեթոդաբանական աշխատանքները), որոնց ստեղծման համար թեկնածուներն առաջադրվում են «Համագործակցության աստղեր» միջպետական մրցանակին:-0-
