ԱՊՀ միջխորհրդարանական վեհաժողովի նիստը տեղի կունենա Պետերբուրգում

ԱՊՀ միջխորհրդարանական վեհաժողովի (ՄԽՎ) 32-րդ լիագումար նիստը հինգշաբթի կբացվի Պետերբուրգի Տավրիյան դղյակում, որը ՄԽՎ-ի շտաբ-գրասենյակն է, հաղորդում է վեհաժողովի մամուլի ծառայությունը։

ԱՊՀ ՄԽՎ խորհրդի նախագահ, ՌԴ Դաշնության խորհրդի խոսնակ Սերգեյ Միրովոնի կողմից բացվող նիստին կմասնակցեն ԱՊՀ մասնակից-պետությունների խորհրդարանական, նախարարական և գերատեսչական, ինչպես նաև երիտասարդական քաղաքականության ոլորտում իրավասու, Արհմիությունների համընդհանուր համադաշնության պատվիրակությունները։

Նիստի մասնակիցները կքննարկեն «Երեխաների և երիտասարդների դաստիարակության մասին» և «Քաղաքացիների էթնոմշակութային հասարակական միավորումների մասին» մոդելային օրենքների մշակման գործընթացը։

ԱՊՀ մասնակից-պետություններում երիտասարդական ժամանակակից քաղաքականության օրենսդիր հիմքերի ձևավորման մասին կպատմեն Ուկրաինայի Գերագույն ռադայի նախագահ Վլադիմիր Լիտվինովը և Բելառուսի Հանրապետության Ազգային ժողովի Հանրապետության խորհրդի նախագահ Բորիս Բատուրան։

1941-1945 թթ.-ի Հայրենական մեծ պատերազմի հաղթանակի 65-րդ տարեդարձի տոնակատարությունների նախապատրաստման մասին զեկույց կընթերցի ԱՊՀ ՄԽՎ պաշտպանության և անվտանգության հարցերի մշտական հանձնաժողովի նախագահ Վիկտոր Վոյտենկոն։

ՌԴ ներքին գործերի նախարարության ճանապարհային երթևեկության անվտանգության ապահովման դեպարտամենտի պետ Վիկտոր Կիրյանովը կպատմի 2009 թ.-ին Մոսկվայում անցկացվելիք Ճանապարհային երթևեկության անվտանգությանը նվիրված նախարարական համաշխարհային կոնֆերանսի անցկացման մասին։

ԱՊՀ պետությունների միջխորհրդարանական վեհաժողովը հիմնադրվել է 1992 թ.-ի մարտի 27-ին։ 1995 թ.-ի մայիսին ԱՊՀ պետությունների ղեկավարները ստորագրել են ԱՊՀ ՄԽՎ-ի մասին կոնվենցիա, որի համաձայն՝ Վեհաժողովը միջպետական մարմնի պաշտոնական կարգավիճակ ստացավ և առաջատար տեղ զբաղեցրեց Անկախ պետությունների համագործակցության մարմինների համակարգում։

ԱՊՀ ՄԽՎ գործունեության տարիների ընթացքում ընդունվել են ավելի քան 200 փաստաթղթեր, որոնք ապահովել են Համագործակցության պետությունների ազգային օրենսդրությունների մերձեցումը։-0-