Անկախ պետությունների համագործակցության (ԱՊՀ) Հակաօդային պաշտպանության (ՀՕՊ) միասնական համակարգը կմասնակցի յուրաքանչյուր մասնակից-պետության պաշտպանության գործին, երեքշաբթի Մոսկվայում լրագրողներին հայտարարել է ՌԴ Ռազմաօդային ուժերի գլխավոր հրամանատար, գեներալ-գնդապետ Ալեքսանդր Զելինը, հաղորդում է «ՌԻԱ Նովոստին»։
«ԱՊՀ ՀՕՊ միասնական համակարգը կատարում է ինչպես կանխման, այնպես էլ հնարավոր հակառակորդի հարձակմանը դիմակայելու խնդիրներ։ Մենք, իհարկե, կմասնակցենք յուրաքանչյուր մասնակից-պետության պաշտպանության գործին, եթե խախտվի ԱՊՀ ՀՕՊ միասնական համակարգի մասնակից-երկրների սահմանը», - ասել է Զելինը։
ԱՊՀ մասնակից-պետությունների ՀՕՊ միասնական համակարգը (ՄՀ) ստեղծվել է 1995 թ.-ի փետրվարի 10-ին։ Դրա կազմում են Համագործակցության տասը պետություններ՝ Հայաստանը, Բելառուսը, Վրաստանը, Ղազախստանը, Ղրղզստանը, Ռուսաստանը, Թուրքմենստանը, Տաջիկստանը, Ուզբեկստանն ու Ուկրաինան։
ՀՕՊ ՄՀ-ն ստեղծվել է օդային տարածքում Համագործակցության մասնակից-պետությունների սահմանների պահպանումն ապահովելու, մասնակից-պետություններին օդատիեզերական իրավիճակի մասին տեղեկացնելու և հռթիռային ու օդային հարձակման մասին զգուշացնելու, ինչպես նաև օդային հարձակմանը դիմակայելու նպատակով հակաօդային պաշտպանության զորքերի համաձայնեցված գործողությունների իրականացման համար։
Այժմ ԱՊՀ ՀՕՊ ՄՀ զորքի խմբավորումը ներառում է հակաօդային պաշտպանության յոթ բրիգադ, 46 զենիթահրթիռային մասեր, որոնք սպառազինության մեջ ունեն С-125, С-75, С-200 զենիթահրթիռային համալիրներ և տարբեր մոդիֆիկացիայի С-300-ներ, կործանիչ ավիացիայի 23 մասեր, ՄիԳ-29, ՄիԳ-31 և Սու-27 զինված կործանիչներ, ռադիոտեխնիկական զորքի 22 միավորումներ և մասեր, ռադիոէլեկտրոնային պայքարի երկու ստորաբաժանումներ։-0-
